Բրիտանացի բռնցքամարտիկ Էնթոնի Օգոգոն, ով ելույթ է ունենում 75 կգ քաշային կարգում, Լոնդոնի 2012 թվականի ամառային Օլիմպիական խաղերում իր առաջին հաղթանակը նվիրել է հիվանդ մորը։ Մի քանի օր առաջ մարզիկի մոր գլխուղեղում արյունազեղում էր առաջացել, և բռնցքամարտիկը լրջորեն մտածում էր Օլիմպիադայում իր ելույթներից հրաժարվելու մասին, սակայն վերջին պահին որոշեց ամեն դեպքում հանդես գալ:
«Այս հաղթանակս նվիրում եմ մորս։ Ես նրան իմ հաղթանակի մասին կպատմեմ հեռախոսով։ Չեմ կարծում, որ նա կարող էր դիտել մենամարտը։ Կարծում էի, որ ելույթ չեմ ունենա Օլիմպիադայում, բայց նրա ինքնազգացողությունը լավացավ»,- Hatton Boxing-ի փոխանցմամբ` ասել է Օգոգոն ։
Լոնդոնի Օլիմպիադայում իր առաջին մենամարտում բրիտանացին 13։6 հաշվով պարտության մատնեց Ջունիոր Կաստիլյոյին, ով ներկայացնում էր Դոմինիկյան Հանրապետությունը։
