Ամենատարածված` քթի վիրահատությունն արժե 200-500 հազար դրամ: Այսօր լրագրողների հետ հանդիպման ժամանակ ասաց պլաստիկ վիրաբույժ, բժշկական գիտությունների թեկնածու Կարեն Դանիելյանը` խոսելով «Պլաստիկ վիրաբուժության դերն ու նշանակությունը հայ հասարակության կյանքում» թեմայով:
Ըստ մասնագետի՝ իրականում պլաստիկ վիրաբուժությունը երիտասարդ մասնագիտություն է և բաղկացած է երկու հիմնական մասից՝ վերականգնողական և էսթետիկ վիրաբուժություն: Բժշկի խոսքով՝ առաջինի դեպքում շտկվում են բնածին արատները, հետվիրահատական, օնկոլոգիական դեֆորմացիաները (հեռացված կուրծքը), տրավմաներից հետո նյարդերի հատուկ լուսանցքների դեֆեկտները:
Էսթետիկ վիրաբուժության մեջ մտնում են «դեմքի, ականջախեցիների վիրահատությունները, մազերի տրանսպլանտացիան, որովայնի ձգումը, կոնտուրային պլաստիկան, լիպոսակցիան, լիպոֆիլինգը, իմպլանտները` հետույքի, սրունքի, կրծքի:
Էսթետիկ վիրահատության մի մասն են նաև ներարկումները, որով ևս կարելի է ստանալ ձիգ մաշկ:
Հայաստանում հաճախակի վիրահատության են ենթարկում քիթը` չորս վիրահատությունից երեքը քթի վիրահատություն է, այնուհետև՝ ականջախեցիների, կրծքի, որովայնի առաջնային պատի վիրահատությունները»:
Վիրաբույժը նկատեց, որ Հայաստանում պլաստիկ վիրաբուժությունն ավելի էժան է, քան ՌԴ-ում և Եվրոպայում: Նա նշեց, որ օրինակ՝ քթի վիրահատությունն արժե 200-500 հազար դրամ:
Բժիշկը խոսեց նաև այն մասին, թե որ դեպքերում է հրաժարվում վիրահատությունից: «Երբ հիվանդի մոտ նկատվում է սրտային, թոքային անբավարարություն, և երբ հիվանդը պսիխոէմոցիոնալ վիճակում է: Մարդիկ կան, որ կարծում են` քիթը վիրահատելով իրենց բարդույթը կվերանա: Վիրահատելով նման մարդկանց՝ կոմպլեքսը չի վերանում»,- ասաց բժիշկը՝ հավելելով, որ էսթետիկ վիրաբուժության դիմողների 20 %-ը տղամարդ է, 80%-ը՝ կին:
Պլաստիկ վիրաբույժը նշեց, որ բոլոր վիրահատություններում հետվիրահատական խնդիրների հնարավորությունը կազմում է 10% : Կ. Դանիելյանի խոսքով՝ այս դեպքում կրկին դիմում են վիրահատության` դիմելով նույն կամ այլ բժշկի:
