Մեր լրատվամիջոցները սիրում են սենսացիոն, ինտրիգային երևույթները, այդ պատճառով էլ այժմ բարձրացվել է ՀՀԿ-ԲՀԿ ուռճացված խնդիրը և ասպարեզում հիմնականում դա է»,- քաղաքական օրակարգում ներկոալիցիոն խնդիրների գերակայությանն անդրադառնալով, «Առաջին լրատվականի» հետ զրույցում կարծիք հայտնեց ԱԺ ՀՅԴ խմբակցության քարտուղար Արտյուշա Շահբազյանը:
Բայց ըստ Շահբազյանի` խորհրդարանական ընդդիմությունը պասիվ չէ և աշխատում է:
Խոսելով արտախորհրդարանական ընդդիմության մասին` Շահբազյանն ասաց, որ վերջիններս վաղուց հանրահավաքներ են անում, բայց նորից արտահերթ ընտրությունների հարց բարձրացնելը դառնում է ծիծաղելի:
Հայաստանում եգիպտական մոդելի կրկնության հավանականության վերաբերյալ խոսակցություններին անդրադառնալով, Շահբազյանը նշեց. «Կրկնությունը հիշեցնում է copy-past-ի տարբերակը, գուցե կան ուժեր, որ այդպես անում են, բայց ես չեմ կարծում, որ Հայաստանը պիտի ինքնանպատակ ընկնի ինչ-որ տրամադրությունների մեջ»:
Շահբազյանի գնահատմամբ, մենք մեր կոնկրետ խնդիրներն ունենք և պետք է հստակ գիտակցենք, թե ինչ ենք ուզում փոխել, ինչպես ենք ուզում այդ փոփոխությունն իրականացնել` ուզում ենք իշխանություն, թե քաղաքականություն փոխել:
«Մենք պիտի ելնենք մեր օրակարգերից, ոչ թե հետևենք թե Եգիպտոսում, Վրաստանում կամ մեկ այլ տեղ ինչ է կատարվում: Այդ ոգևորությամբ ու խանդավառությամբ կարելի է ընկնել գունավոր հեղափոխությունների գիրկը և երգել ուրիշի նվագի տակ»,- ընդգծեց դաշնակցական պատկամավորը:
