Երեկ՝ Յուրմալայի «Նոր ալիք-2012» փոփ երաժշտության երիտասարդ կատարողների 11-րդ միջազգային մրցույթի վերջին՝ երրորդ օրը, Հայաստանը ներկայացնող երգիչ Սուրեն Առուստամյանը «Հեղինակային երգ» ծրագրում կատարեց Բրենդոն Սթոնի (Brandon Stone) Next to you երգը:
Մրցութային վերջին օրը, ըստ մրցույթի կանոնադրության, ժյուրիի անդամների քվեարկությունը գաղտնի էր: Այսօր՝ մրցութային երեք օրերի արդյունքով էլ կորոշվի՝ ով է հաղթողը:
Հանդիսատեսը 1 օր ունի, որպեսզի sms քվեարկության միջոցով հնարավորություն ունենա ընտրել այն մասնակցին, ով կարժանանա «Հանդիսատեսի համակրանք» մրցանակին:
Այս տարի «Նոր ալիքի» մրցանակային ֆոնդի 100 հազար եվրոն կբաշխվի մրցութային առաջին երեք տեղերը զբաղեցնող մասնակիցների միջև` 50 հազար եվրո կստանա հաղթող մասնակիցը, երկրորդ հորիզոնականն զբաղեցրած մասնակիցը կստանա 30 հազար եվրո, իսկ երրորդ տեղում հայտնված մասնակիցը՝ 20 հազար եվրո:
Այս տարի մրցույթի ժյուրիի անդամներն էին երգչուհիներ` Լայմա Վայկուլեն, Վալերիան, պրոդյուսեր Կոնստանտին Մելաձեն, երգիչներ Վալերի Մելաձեն, Իգոր Նիկոլաևը, Լեոնիդ Ագուտինը, պրոդյուսեր Իգոր Մատվիենկոն, մրցույթի հիմնադիրներ Ռայմոնդ Պաուլսն ու Իգոր Կրուտոյը:
Հիշեցնենք, որ հուլիսի 25-ին՝ «Նոր ալիքի» մրցութային առաջին օրը Սուրեն Առուստամյանը ներկայացրեց Էրիկ Քլեփթոնի` Change The World երգը, իսկ հուլիսի 26-ին հանդես եկավ Անդրեի` «Իմ սերը քեզ» կատարմամբ ու մրցութային երկու օրերին զբաղեցրեց 8-րդ հորիզոնականը:
Մրցույթին մասնակցում է 14 երկրների 16 երիտասարդ կատարող:
