Տաջիկստանում՝ Լեռնային Բադաշանի ինքնավար մարզում, Թալիբ Այոմբեկովի զինված խմբավորումը, որի դեմ իշխնաությունները մի քանի օր շարունակ ռազմական գործողություններ էին իրականացնում, հրաժարվել է հանձնել զենքը: Այս մասին հաղորդում է Avesta լրատվական ծառայությունը՝ վկայակոչելով ինքնավար մարզի վարչազմի մամուլի ծառայությանը:
«Պաշտոնական իշխանությունների բոլոր ջանքերը՝ համոզել Այոմբեկովին ու նրանց մարդկանց` հանձնել զենքերը և գեներալ Նազարովի սպանությանը մասնակից մարդկանց, հաջողությամբ չեն պսակվել: Թալիբ Այոմբեկովը, պահից օգտվելով, իր շուրջն է համախմբել մի խումբ զինված անձանց՝ դրանով խոչընդոտելով հանցագործության օբյեկտիվ հետաքննությանը, և ամենակարևորը, հանցավոր գործունեությամբ վտանգի է ենթարկել խաղաղ բնակչությանը»,- ասվում է հայտարարության մեջ:
Դրանում նաև նշվում է, որ չնայած հայտարարվել էր, որ ինքնավար մարզում դադարեցվում են ռազմական գործողությունները, բարիկադները հեռացնելու հարցը դեռ չի որոշվել:
«Ապակառուցողական ուժերը դեռ կոչ են անում բնակչությանը չարտոնված ցույցեր անցկացնել»,- ասվում է հայտարարության մեջ:
Իշխանությունները տեղի բնակիչներին կոչ են արել չտրվել սադրանքների, չհավատալ անհիմն բամբասանքներին:
Հուլիսի 24-ին Լեռնային Բադաշանի ինքնավար մարզում հատուկ գործողություններ են սկսվել զինված խմբավորման չեզոքացման համար: Տաջիկստանի իշխանությունները հենց այդ խմբավորման վրա են դրել հատուկ ծառայությունների գեներալ Աբդուլլահ Նազարովի սպանության պատասխանատվությունը:
Պաշտոնական տվյալներով՝ հատուկ գործողությունների ընթացքում սպանվել է խմբավորման 30 անդամ, ևս 40-ը ձերբակալվել է: Հաղորդվում է նաև, որ զոհվել է ուժային կառույցների 12, վիրավորվել՝ 23 անդամ: Խաղաղ բնակչության շրջանում զոհեր ու վիրավորներ, ըստ պաշտոնական տվյալների, չկան: