Եթե ահազանգը հրապարակայնացնելը վտանգներ պետք է ստեղծի, ուրեմն մեր ԶՈՒ-ն ավելի խայտառակ վիճակում է: Այս մասին «Առաջին լրատվական»-ի հետ զրույցում այս մասին ասաց Վանաձորի Հելսինկյան ասոցիացիայի նախագահ Արթուր Սաքունցը` անդրադառնալով իր ղեկավարած գրասենյակին ուղղված երկրորդ անանուն նամակին:
Հարցին, թե վերջին նամակի հրապարակայնացումից հետո հնարավո՞ր է մյուս 16 զինծառայողի համար վտանգավոր դառնա նամակում նշված զորամասում ծառայելը, ասաց, որ նամակում ահազանգը հենց վտանգված լինելու մասին է:
«Հիմա, որ վտանգված են ու ահազանգում են, որ վտանգված են, դա կարող է փրկե՞լ, թե՞ վնասել: Եթե կարող է վնասել, նշանակում է, որ ավելի խայտառակ վիճակ է ԶՈՒ-ում, նշանակում է, որ ոչ թե ԶՈՒ է, այլ հակառակորդի թիկունքում գտնվող զորամաս, պարտիզանական ջոկատ: Այսինքն` պետք է ընդհանրապես չահազանգե՞լ՝ վախենալով, որ խոսելու դեպքում ավելի վատ կլինի»,- իր տեսակետը հայտնեց իրավապաշտպանը` հավելելով, որ իր գործունեության փորձից գիտի, որ հրապարակայնությունն ավելի շատ բուժիչ նշանակություն ունի:
Հիշեցնենք, որ Հելսինկյան քաղաքացիական ասամբլեայի Վանաձորի գրասենյակի էլեկտրոնային փոստի հասցեով երեկ ստացվել էր անանուն նամակ զինծառայող Թաթուլ Գրիգորյանի պահվածքի վերաբերյալ: Նամակի հեղինակը նշում էր, որ նրա հետ նույն զորամասում ծառայում է ևս 16 զինծառայող:
«Շատ վատ ա էտ վաշտում վիճակը, և ոչ ոք ոչինչ չի կարող անել, էտ զինվորը համարյա ամեն օր հարբում ա, գիշերվա ժամը 4-ին մտնում ա զորանոց, գոռում ա, մյուս զինվորներին քնից հանում ա, ջարդում- փշրում ա, սաղ վախի մեջ են քնում, որ ինքը խմած ա լինում, ինչ կուզի կանի, ինքը ՀՀԿ-ական ազգային ժողովի պատգամավորի տղա ա, ամեն ամսվա վերջ զինվորներից հավաքում ա իրանց հասանելիք 3400 դրամը, հոգեպես ճնշում ա, ինքը ամենակարողն ա»,- նշել էր նամակի հեղինակը:
