«Օգոստոսի 5-ին կայանալիք Թալինի քաղաքապետի արտահերթ ընտրությունները ոչ միայն համայնքում են թեժ մթնոլորտ ստեղծել, այլև Հանրապետական կուսացությունում կրքեր բորբոքել: Բանը հասել է նրան, որ գործին խառնվել է նաև Հովիկ Աբրահամյանը, որը, ըստ էության, ՏԻՄ ընտրությունների բեռն իր վրա է վերցրել և «վերևներին» վստահեցրել, որ ամեն ինչ «օքեյ» է լինելու, և անակնկալներ չեն լինելու»,- գրում է «Հրապարակ»-ը և հավելում.
«Նախօրեին՝ թեկնածուների գրանցման վերջին օրը Արգամիչը հասել էր Թալին, որպեսզի տեղում ստուգի «դվիժենին» և ինքնառաջադրված թեկնածուներին հորդորի ինքնաբացարկի դիմումներ գրել, որպեսզի «մաքուր» ընտրություններ ընթանան ՀՀԿ-ԲՀԿ ճամբարների միջև: Սակայն, ինչպես պարզվեց, Աբրահամյանի այցը ցանկալի արդյունք չտվեց, և օրվա վերջում արդեն պաշտոնապես հաստատվեց, որ Թալինի քաղաքապետի 6 թեկնածուներից ինքնաբացարկ է հայտնել միայն մեկ հոգի՝ անկուսակցական, ինքնառաջադրված Տիգրան Հարությունյանը՝ ՀՅԴ-ական Արծվիկ Մինասյանի բաջանաղը: Մնացած 3-ի դեպքում Արգամիչի «կտերը», երևում է՝ չեն անցել: Հիմա խաղի մեջ են շարունակում մնալ ՀՀԿ-ական Սարգիս Արամյանը, ԲՀԿ-ական Վազգեն Խաչատրյանը և ինքնաառաջադրվածներ Վորոշ Խաչատրյանը՝ Թալինի քաղաքապետարանի աշխատակազմի քարտուղարն ու համատեղության կարգով փոխքաղաքապետը, տեղի անձնագրայինի նախկին պետ Գագիկ Կարապետյանն ու Էդվարդ Գրիգորյանը՝ ժորա Գրիգորյանի ազգականը»:
