1983թ. հուլիսի 27-ին, Հայ հեղափոխական բանակի հինգ հայ երիտասարդներ` Վաչե Տաղլեանը, Սեդրակ Աճեմյանը, Սարգիս Աբրահամեանը, Սիմոն Եահընյանը և Արա Քերջլեանը, Պորտուգալիայի մայրաքաղաք Լիսաբոնում պայթուցիկ նյութերով բեռնված ավտոմեքենան քշեցին Թուրքիայի դեսպանատան դարպասից ներս: Այս գործողությունից 29 տարի է անցել: Հայ հեղափոխական բանակի 5 մարտիկների հիշատակին այսօր Կոմիտասի անվան պուրակում հարգանքի տուրք մատուցեցին Հայ հեղափոխական դաշնակցության երիտասարդական թևի ներկայացուցիչները: Կոմիտասի անվան պուրակում հատուկ ցուցանակների վրա երիտասարդները հավաքել էին 80-ական թթ աշխարհի հեղինակավոր մամուլի էջերում տպագրված Լիսաբոնում տեղի ունեցածի վերաբերյալ բոլոր նյութերը:
Միջոցառման մասնակիցները քիչ ավելի ուշ հնարավորություն կունենան լսելու օրվա ոգով երգեր, այնուհետև գործողության վերաբերյալ փաստավավերագրական ֆիլմի դիտում է նախատեսվում:
Միջոցառումը կավարտվի հիշատակի մոմավառությամբ: Ինչպես «Առաջին լրատվական»-ի հետ զրույցում նշեց ՀՅԴ հայաստանի երիտասարդական կենտրոնական վարչության անդամ Ազատուհի Սիմոնյանը, միջոցառումը նպատակ ունի հայ հասարակությանն իրազեկել, որ ունեցել է այնպիսի նվիրյալներ, ովքեր իրենց կյանքը չեն խնայել Հայ դատի համար:
Ըստ ՀՅԴ ներկայացուցչի` հինգ մարտիկների գործողությունն իրականում զինյալ պայքարի, հայ հեղափոխական բանակի ակտերից մեկն էր, որը հետագայում բավականին մեծ ազդեցություն թողեց ցեղասպանության ճանաչման և այս հարցը միջազգայնորեն քննարկելու գործում:
«Այսօր Հայաստանում հայ հասարակությունն ընդհանրապես տեղյակ չէ, որ այսպիսի հերոսներ են եղել: Մենք փորձում ենք այսպիսի միջոցառումներով իրազեկել հասարակությանը և այս մարդկանց հուշն ու հիշատակը բարձր պահել»,- մանրամասնեց Ազատուհի Սիմոնյանը` հույս հայտնելով, որ գոնե 30 ամյակին այս հինգ հայ մարտիկների գործողությունը հիշողների թիվը բավականին կշատանա: