Քուվեյթի իշխանությունները, մտահոգված լինելով հնարավոր սոցիալական հուզումներով, որ կարող են տեղի ունենալ երկրում, կանխարգելիչ քայլերի են դիմել:
Ինչպես չորեքշաբթի օրը հայտնել է «Ալ-Քաբաս» թերթը, Քուվեյթի իշխանությունները որոշում են ընդունել ավելացնել երկրի զինված ուժերի բոլոր ստորաբաժանումների աշխատավարձերը: Թերթը նշում է, որ բանակի, ոստիկանության, ազգային գվարդիայի և հրդեհային անվտանգության ծառայության աշխատողների աշխատավարձերն ավելացել են 72-115%-ով:
Ծառայողների ամենամյա բյուջեն ավելացել է 200 մլն դինարով (713,5 մլն դոլար), հրատարակչությանն է հայտնել նախարարների կաբինետի պետնախարար Ռուդհան Ալ-Ռուդհանը: Նրա խոսքերով, զինծառայողների աշխատավարձի բարձրացումը կապված է այս տարվա փետրվարին նշվող քուվեյթական պետության կեսդարյա հոբելյանի, իրաքյան բռնազավթումից Քուվեյթի ազատագրման 20-ամյակի, ինչպես նաև Սաբահ Ալ-Ահմեդ Ալ-Ջաբեր Ալ-Սաբահի գահին բազմելու 5-ամյակի հետ:
Կրտսեր սպայական դասի աշխատավարձը 156 դինարից (556 դոլար) հասել է 300 դինարի (1070դոլար): Բրիգադային գեներալի աշխատավարձը հիմնականում կազմել է 780 դինար (2782 դոլար), սակայն բարձրացվել է մինչև 1430 դինարի (5100 դոլար), նշում է թերթը:
Աշխատավարձերի բարձրացումն ազդում է նաև բանակում ծառայող ներգաղթյալների վրա:
Երեք հոբելյանների հետ կապված Էմիրությունների բոլոր բնիկները, որոնց թիվը գերազանցում է 1,1 մլն-ը, կստանան 1000 քուվեթյան դինար (3572 դոլար)` որպես դրամական փոխհատուցում: Այս պարգևատրումների ընդհանուր գումարը կազմում է մոտավորապես 4 մլրդ դոլար:
Բացի այդ, այս տարվա փետրվարից սկսած` բնիկ քուվեյթցիներն անվճար կստանան հիմնական մթերքները: 14 ամիս` մինչև 2012թ.-ի ապրիլի 1-ը, նրանց մթերք կմատակարարվի անհատույց: Քուվեյթում բնակվող ավելի քան 2,5 մլն արտասահմանցի բնակիչները չեն հիշատակվում այս օգնությունների ոչ մի ցուցակում: Անցյալ տարիներին էլ է պատահել, որ բոլոր քուվեյթցիները ստացել են կառավարական տարբեր սուբսիդիաներ, սակայն դրանք այսպես մեծաքանակ չեն եղել:
