Վերջին 1,5 տարվա ընթացքում Սիրիայում ծավալվող գործընթացներն ակնհայտ են դարձնում հայաստանյան իշխանությունների՝ սիրիահայ համայնքի հանդեպ կրավորական կեցվածքը: Այսօր տեղի ունեցած մամուլի ասուլիսի ժամանակ այս մասին ասաց «Սարդարապատ» շարժման նախաձեռնող խմբի անդամ Գարեգին Չուգասզյանը:
««Հայկական աշխարհի» և «Արի տուն», այսպես կոչված, ծրագրերի մասին բարձրագոչ հայտարարությունները պայթող փուչիկների նման առ ոչինչ են դառնում վերջին մեկ տարվա ընթացքում սիրիահայության նկատմամբ «Արմավիա» ընկերության դրսևորած վարքագծի և այդ երևույթի նկատմամբ պաշտոնական շրջանակների պիղատոսյան անգործության ու լռության խորապատկերի վրա: Պետությունն ստեղծված իրավիճակին լուրջ մոտեցում չի ցուցաբերում, իսկ իրադարձությունների զարգացումը խոսում է այն մասին, որ 60 հազարանոց սիրիահայ համայնքը ենթակա է բազմաթիվ վտանգների, այդ թվում՝ մասնակի և անգամ ամբողջական տարհանման:
Սիրիահայությանը Սիրիայում պահելու համար լուրջ գործողություններ են անհրաժեշտ, որոնք, սակայն, հայաստանյան իշխանությունների կողմից այդպես էլ կյանքի չեն կոչվում: Միաժամանակ, չեն իրագործվում նաև սիրիահայության արտահոսքը Հայաստան ուղղելու ջանքերը»,- ասաց Գարեգին Չուգասզյանը:
Ամփոփելով՝ «Սարդարապատ» շարժման նախաձեռնող խմբի անդամը տեղեկացրեց, որ առաջիկա մեկ ամսում իրենք հանդես են գալու հայրենադարձության կազմակերպման 2 կարևոր նախաձեռնություններով:
