Facebook Inc.-ի կորուստները 2012 թվականի երկրորդ եռամսյակում կազմել են 157 միլիոն դոլար: Այս մասին հաղորդում է RBK-ն` հղում անելով ընկերության եռամսյակային հաշվետվությանը: Մեկ բաժնետոմսի հաշվարկով կորուստը կազմել է 0,08 դոլար: 2011 թվականին նույն ժամանակահատվածում Facebook-ի մաքուր շահույթը կազմել է 240 միլիոն դոլար, իսկ մաքուր շահույթը մեկ բաժնետոմսից` 0,11 դոլար:
2012 ֆինանսական տարվա երկրորդ եռամսյակում աշխարհում խոշորագույն սոցիալական ցանցի եկամուտը աճել է 32%-ով և կազմել 1,18 միլիարդ դոլար: Հունիսի 30-ի դրությամբ` սոցցանցի ակտիվ օգտատերերը 955 միլիոնն են: Այդ ցուցանիշը 29 տոկոսվ ավելի է 2011-ի նույն ժամանակահատվածի համեմատ:
Անցած տարվա երկրորդ եռամսյակի համեմատ Facebook-ի բջջային տարբերակից օգտվողների թիվն աճել է 67%-ով` հասնելով 543 միլիոնի: Գովազդից ստացված եկամուտը հասել է 992 միլիոն դոլարի, ինչը կազմում է ընկերության ողջ եկամտի 84 տոկոսը: Երկրորդ եռամսյակում գովազդային եկամուտը 2011-ի երկրորդ եռամսյակի համեմատ աճել է 28 տոկոսով:
Ընկերության հիմնադիր Մարկ Ցուկերբերգը ընդգծել է, որ ընկերությունը հետագա մշակումներում առաջնահերթությունը տալու է բջջային տարբերակին:
