1918թ. այս օրը Թիֆլիսում վախճանվեց հրապարակախոս, հասարակական -քաղաքական գործիչ, գրող, մանկավարժ, «Մշակ» թերթի խմբագիր Համբարձում Առաքելյանը:
Ծնվել է 1855թ. ապրիլին Շուշիում, ավարտել Բաքվի ռեալական ուսումնարանը (1879), սովորել Մոսկվայի երկրագործական ուսումնարանում: 1881-ին Շուշիում հիմնադրել է Կովկասի հայոց բարեգործական ընկերության մասնաճյուղը, իսկ 1892-1898թթ. եղել է Թիֆլիսի ընկերության մասնաճյուղի քարտուղարը: 1898-ից ընտրվել է ազգային հոգաբարձության նախագահ:
1904-ին հայ պատվիրակության կազմում, Հայկական հարցի արծարծման նպատակով, մասնակցել է Հաագայի խաղաղության միջազգային կոնգրեսին: 1913-1918թթ. հրատարակել և խմբագրել է «Մշակը»:
1915-ին ստեղծել է հայ գաղթականներին օգնող հանձնաժողով, իսկ 1917-ին հիմնադրել գրագիտություն տարածելու ընկերությունը:
Համբարձում Առաքելյանը գրել է բազմաթիվ գեղարվեստական երկեր, կատարել թարգմանություններ, կազմել «Հանրագիտական բառարան» (հ. 1, 1915, 2-րդ հատորն անտիպ է): Եղել է մի շարք երկրների գիտական ընկերությունների անդամ:
Սպանվել է Թիֆլիսում՝ հանրահավաքի ժամանակ, պատահական կրակոցից: