Վերջերս աստիճանական անկում է նկատվում ղարաբաղյան հակամարտության լուծման բանակցային գործընթացում, այս մասին հայտարարել է բրիտանական «LINKS» հասարակական կազմակերպության գործադիր տնօրեն Դենիս Սամութը: Ըստ ադրբեջանական APA գործակալության` Սամութը նշել է. «Որոշակի հիասթափություն կա ինչպես Ադրբեջանում, այնպես էլ Հայաստանում եւ միջազգային հանրության մեջ` կապված նրա հետ, որ վերջին երկու տարիներին լուրջ առաջընթաց չի գրանցվել ղարաբաղյան հակամարտության կարգավորման գործընթացում: Կարծիք է առաջացել, որ բանակցային գործընթացն արգելափակվել է: Հնարավոր է` դրա պատճառը դարձել են հենց ԵԱՀԿ Մինսկի խմբի համանախագահները: Իմ կարծիքով, եկել է բանակցություններն ակտիվացնելու ժամանակը»: Սամութը դրական է գնահատել հոկտեմբերի 27-ին նախատեսված Ադրբեջանի, Հայաստանի եւ Ռուսաստանի նախագահների հանդիպումը: Նա նաեւ նշել է, որ վերջին երկու տարիներին այս ձեւաչափով հանդիպումները զգալի արդյունք չեն տվել. «Հակամարտությունը լուծելու համար պետք է «ճանապարհային քարտեզ», այլ ոչ թե հերթական հռչակագիր: Ես համարում եմ, որ բանակցությունների հաջորդ փուլին անցնելու համար հիմք կա, որը ենթադրում է «ճանապարհային քարտեզի» ստեղծում: Համակարտության մեջ ընդգրկված եւ նրա հետեւանքով տառապող մարդիկ ցանկանում են որոշակի փոփոխություններ տեսնել գործընթացում»:
