Ինչպես տեղեկացրել էինք, Տավուշի մարզում` Դիլիջանի անտառներում, բռնկված հրդեհը միտումնավոր դրդապատճառներ ունի: Արտակարգ իրավիճակների նախարարության մամուլի քարտուղար Նիկոլայ Գրիգորյանը, արձագանքելով այս դիտարկմանը, նշեց, որ ինքը չի կարող պնդել, որ անտառները միտումնավոր են այրվել: Իսկ մեր այն հարցին, թե չի էլ կարող բացառել, որ հրդեհները միտումնավոր են բռնկվել, ավելացրեց. «Մեր կյանքում ոչինչ չի կարելի բացառել: Բայց Տավուշի և Լոռու մարզում, հաշվի առնելով հարուցված քրեական գործերը, որոնք կապված են ապօրինի անտառահատումների հետ և դրանց հետևանքերը վերացնելուն, հավանականություն կա, որ հրդեհները միտումնավոր դրդապատճառներ ունենան: Հիշեցնենք, որ երեկ մի շարք բնապահպանական կազմակերպություններ և անհատներ հայտարարություններ են տարածել սոցիալական կայքերում` հայտնելով, որ Տավուշի մարզում՝ Դիլիջանի մերձակա անտառներում, բռնկվել են անտառային հրդեհներ, որոնք կարող են տարածվել նաև ազգային պարկում: Վտանգ կա, որ հրդեհը կհասնի սոճու անտառներին: