«Ադրբեջանը ԼՂ խնդրի լուծման նոր ձևաչափեր է փնտրում»

Ստամբուլում դեկտեմբերի 23-ին Թուրքիայի, Ադրբեջանի և Իրանի ԱԳ նախարարների եռակողմ հանդիպման արդյունքում համատեղ հայտարարություն է ընդունվել, որտեղ ԱԳ նախարարները մասնավորապես ընդգծել են, որ հակամարտությունների կարգավորումը տարածաշրջանում կապահովի տարածաշրջանում երկարաժամկետ և ամուր խաղաղության ու կայունության հաստատման նպաստավոր պայմաններ: Սրան հասնելու համար կարևորվել է հիմքի նախապատրաստումը, որը կարող է հանգեցնել տարածաշրջանում հակամարտությունների խաղաղ կարգավորմանը` տարածքային ամբողջականության սկզբունքի պաշտպանմամբ:
Ինչպես տեղեկացնում է 1 News.az-ը, ադրբեջանցի քաղաքագետ Ֆիկրետ Սադիխովը այս հայտարարության առիթով մեկնաբանություն է արել. «Պետք չէ գայթակղվել նրանով, թե հիմա Իրանը իր ողջ ուժով ձեռնամուխ կլինի ղարաբաղյան խնդրի կարգավորմանը, սակայն պետք է նշել, որ պաշտոնական Թեհրանը Հայաստանի նկատմամբ ազդեցության լծակ ունի: Կարծում եմ, որ առավել կարևոր է այն, որ ԵԱՀԿ Մինսկի խումբը` աշխարհի առաջատար տերությունների ջանքերով` ղարաբաղյան խնդիրը կարգավորելու ուղղությամբ հասավ նրան,որ Ադրբեջանը տարածաշրջանի մյուս երկրների հետ հակամարտության կարգավորման նոր ձևաչափեր է փնտրում»,- ասել է Սադիխովը: Նա նաև նշել է, որ Իրանի ԱԳ նախարար Մ.Մոթաքիի պաշտոնանկությունից հետո փորձագետները Իրանի արտաքին քաղաքականության ոլորտում որոշակի փոփոխություններ են սպասում, և արդեն առկա են դրա նախանշանները. «Այսինքն՝ Իրանը կարող է ազատականացնել իր արտաքին քաղաքական ուղղությունները, և այդ հարցում նրան կարող են օգնել Թուրքիան և Ադրբեջանը»,- ասել է քաղաքագետը` հավելելով. «Այժմ Իրանը սերտորեն համագործակցում է Հայաստանի հետ, քանի որ նրա միջոցով տրանսպորտային միջանցք ունի դեպի արտաքին աշխարհ: Սակայն Թուրքիան և Ադրբեջանը կարող են Իրանին առաջարկել ավելի լայն հնարավորություններ: Կարծում եմ, Ստամբուլի եռակողմ` Թուրքիայի, Ադրբեջանի և Իրանի ԱԳ նախարարների հանդիպումը նվիրված էր հենց այս թեմային»: