«Միջազգային ծրագրերով կրթական գործունեություն ծավալելու համար պետք չէ փոփոխել «Լեզվի մասին» օրենքը: Այդ օրենքը պետք է դուրս գար այդ փաթեթից. դա ֆունդամենտալ օրենք է, պետական անվտանգությունից բխող օրենք է»,- մեզ հետ զրույցում կարծիք հայտնեց ԿԳ նախկին նախարար Էդուարդ Ղազարյանը:
Ղազարյանը նկատեց, որ թե՛ նախագահը եւ թե՛ ԱԺ նախագահը եկել էին այդ համոզմանը, սակայն այժմ էլ` ինչ-որ իրավաբանների հետ քննարկումներից հետո, ուզում են ինչ-որ մի կետ ավելացնեն, համաձայն որի` միջազգային ծրագրերով կրթական գործունեություն իրականացնող կրթական հաստատությունների կարգը սահմանվում է «Հանրակրթության մասին» օրենքով, ինչի անհրաժեշտությունը Ղազարյանը եւս չի տեսնում: «Կարելի էր պարզապես լրացում անել «Կրթության մասին» օրենքում եւ մտցնել միջազգային լիցեյների գաղափարը, ինչը շատ տարածված է եվրոպական մի շարք երկրներում: Կարծում եմ, որ այնուամենայնիվ, «Լեզվի մասին» օրենքին ձեռք չեն տա եւ միայն կսահմանափակվեն «Հանրակրթության մասին» օրենքում համապատասխան լրացումներ կատարելով», ասաց ԿԳ նախկին նախարարը:
Էդուարդ Ղազարյանը նաեւ նկատեց, որ ի սկզբանե նշվում էր, թե միջազգային չափանիշներին համապատասխան կրթական մակարդակ ապահովելու համար մենք պետք է այլալեզու դպրոցներ ունենանք: Նրա գնահատմամբ, մենք նման դպրոցներ ունենք. «Այնպիսի դպրոցներ, ինչպիսիք են` Ֆիզմաթ դպրոցը, Քվանտը, Ֆոտոն վարժարանը, Բալատոնը, ապահովում են միջազգային բոլոր չափանիշներին համապատասխանող հանրակրթական մակարդակ: Այս դպրոցների սաները մասնակցում են միջազգային բոլոր օլիմպիադաներին եւ միշտ մեդալներով վերադառնում, դրանից էլ լավ չափանի՞շ: Ավելին` մեր մեծ գիտնականները, որոնք համաշխարհային գիտության մեջ ներդրում են ունեցել, հիմնականում ավարտել են հայկական, այն էլ` գյուղական դպրոցներ»:
