Ըստ ավանդության` Օձունի եկեղեցին հիմնադրվել է ք.ծ.հ. 1-ին դարում Թովմաս առաքյալի կողմից:
Եկեղեցին ունի գմբեթավոր բազիլիկի հորինվածք, արևելք-արևմուտք ձգված ուղղանկյուն` 31,62-20,71մ ընդհանուր չափերով, որը, աղոթասրահից բացի, ընդգրկում է երեք կողմից շրջապատող արտաքին սրահը` երկայնական թևերի սենյակով և բաց խորանով:
Օձունի եկեղեցին իր տիպի մյուս հուշարձանների նման ունի երեք մուտք: Եկեղեցին կառուցված է հեշտ մշակվող, դիմացկուն և գեղարվեստական տեսակետից արտահայտիչ, տեղական բաց շագանակագույն ֆելզիտե բազմերանգ սրբատաշ քարերով:
Եկեղեցին տարբեր ժամանակներում ենթարկվել է վերափոխությունների և նորոգումների: 1938 թ. նորոգվել են արտաքին սրահի հարավային թևի հենարանների ստորին 1-2 շարքերը, փոխարինվել և լրացվել են արևմտյան կամարակապ բացվածքի ստորին շարքի անկյունաքարերը, հյուսիսարևմտյան անկյան ներսի երեսապատման քարերը: 1949-50 թթ. ամբողջությամբ քանդվել և վերաշարվել է արտաքին սրահի հարավային թևի կամարաշարը, քանդվել ու վերաշարվել է սրահի հյուսիսային թևի արևմտյան խուլ պատը և ամրացվել է կամարաշարը: 1977 թ. բարեկարգվել է Օձունի եկեղեցու տարածքը, նորոգվել շրջափակող պարիսպը:
