eBay ընկերության նախկին ղեկավար Մեգ Ուիթմանը, որը ժամանակին առաջադրվել էր որպես Կալիֆոռնիայի նահանգապետ և քարոզարշավի վրա ծախսել էր 150 միլիոն դոլար, գլխավորել է էլեկտրոնիկայի ոլորտում աշխարհի ամենամեծ ընկերություններից մեկը` Hewlett Packard-ը: Այս մասին հաղորդում է Reuters գործակալությունը:
«Մեր ընկերության համար կրիտիկական պահը եկել է, այդ պատճառով էլ անհրաժեշտ էր ընկերության ղեկավարության փոփոխություն: Մեզ անհրաժեշտ է օգտվել բիզնեսի զարգացման այն հնարավորություններից, որոնք բացվել են մեր առաջ»,- ասել է ընկերության տնօրենների խորհրդի նախագահ Ռեյ Լեյնը:
Վերջերս Hewlett Packard-ում սկսվել էին լուրջ խնդիրներ այն բանից հետո, երբ որոշ բաժնետերեր ընկերության ղեկավարությանը մեղադրել էին կարևոր տեղեկություններ թաքցնելու մեջ: Դրանից հետո հրաժարական էր տվել Hewlett Packard-ի ղեկավար Լեո Ապոթեքերը: