Մոլդովան ԱՊՀ-ից դուրս գալու գործընթաց է սկսել, հայտարարել է երկրի արտաքին գործերի նախարար Նիկու Պոպեսկուն։ «Մենք սկսում ենք Մոլդովայի կողմից ԱՊՀ-ի շրջանակում պայմանագրերի չեղարկումը։ Մեր պետական կառույցները վերլուծել են ԱՊՀ-ում ստորագրված բազմաթիվ համաձայնագրերի անհրաժեշտությունը, և այս օրերին մենք սկսում ենք մի քանի տասնյակ համաձայնագրերից դուրս գալու ընթացակարգ։ Մենք կթարմացնենք և կհրապարակենք այս ցուցակը: Միայն ՆԳՆ-ի գծով չեղարկում ենք մոտ 20 պայմանագիր»,- ասել է Պոպեսկուն։
Նախարարը նշել է, որ Քիշնևը ԱՊՀ-ի շրջանակում շուրջ 330 համաձայնագրի մասնակից է։ Մոլդովան մտադիր է անդամակցել ԵՄ-ին։ Պոպեսկուի խոսքով՝ երկրի մասնակցությունն այլ ասոցիացիաներին ստորադասվելու է եվրաինտեգրման նպատակին։ «Ակնհայտ է, որ ԱՊՀ-ից դուրս գալը կամ մեր պարտավորությունների հետ անհամատեղելի այս համաձայնագրերի խզումը շարունակվելու է»,- հավելել է նախարարը։
Ուկրաինահայ վերլուծաբան Մարատ Հակոբյանի խոսքերով՝ յուրաքանչյուր երկիր ինքն է ընտրում միջպետական որևէ սուբյեկտում գտնվելու նպատակահարմարությունը։ Դա, ըստ Հակոբյանի, անկախ պետության ինքնիշխան իրավունքն է։
Հարցին, թե Հայաստանը և՞ս կարող է հեռանալ նման կառույցներից՝ ստանալով բավարար արևմտյան աջակցություն, Հակոբյանն արձագանքեց.«Ինչ վերաբերում է նման կառույցներից հեռանալուն, ապա դա պետք է թելադրվի ազգային շահով, և սա այն հարցը չէ, որտեղ պետք է «արևմտյան աջակցություն»։ Նման որոշում կայացնելիս՝ Հայաստանի իշխանությունը պետք է համալիր մոտեցում ցուցաբերի, քանի որ նման կառույցներից դուրս գալը կարող է առաջացնել մի շարք օրենսդրական բացեր, որոնք կանդրադառնան հասարակ քաղաքացիների վրա, ինչպես նաև՝ նրանց հարաբերությունների այս սուբյեկտի անդամ երկրների ու կառույցների հետ»,-«Առաջին լրատվական»-ի հետ զրույցում ասաց նա։
Հակոբյանի դիտարկմամբ՝ եթե վերը նշված կառույցից դուրս գալու քաղաքական կամք կա, կառավարությունը և Ազգային ժողովը պետք է օպերատիվ կերպով ապահովեն այն օրենսդրական վակուումի չեզոքացումը, որը կարող է առաջանալ ընդունված որոշման արդյունքում.«Ինչ վերաբերում է Արևմուտքին, ապա մենք տեսնում ենք, որ գործընկերներն արդեն աջակցում են Հայաստանին՝ ԵՄ դիտորդական առաքելություն ուղարկելով Ադրբեջանի հետ սահման։ Սա նշանակում է, որ Հայաստանը ճանաչվել է որպես անկախ միավոր, որը նաև ժողովրդավարական աշխարհի մաս է։ Հայաստանի իշխանությունը կարող է միայն հետևողական լինել իր գործողություններում և ժամանակը ռացիոնալ օգտագործել»,-եզրափակեց նա։
Հայաստանի Եվրոպական կուսակցության նախագահ Տիգրան Խզմալյանի կարծիքով՝ Մոլդովային կհետևի նաև Ղրղզստանի որոշումը և սա լավ է, քանի որ մենք գործընթացում մենակ չենք մնա.«Ռուսաստանի հակահարվածը նույնպես միայն մեզ ուղղված չի լինի, մի փոքր կլղոզվի։ Վաղուց է պետք համակարգել նախկին խորհրդային երկրների քայլերը, մենք դրանով զբաղվում ենք՝ Վրաստան, Ուկրաինա, նաև Մոլդովա։ Այժմ՝ կուսակցան մակարդակով, հետագայում գուցեև դառնա պետական քաղաքականություն»,-«Առաջին լրատվական»-ի հետ զրույցում ասաց նա։
Խզմալյանի դիտարկմամբ՝ հենց հիմա Ռուսաստանը տարբերակներից մեկը դիտարկում է Մոլդովայի կլանումը Մերձդնեսթրի պաշտպանության քողի տակ.«Սա կանխարգելիչ քայլ է Մոլդովայի կողմից՝ շատ ճիշտ ժամանակին արված։ Հուսանք, որ դա կօգնի իրենց պայքարին»,-եզրափակեց նա։
