Եվրոպական նավթային չորս ամենամեծ ընկերությունների եւ ԱՄՆ միջեւ ձեռք բերված համաձայնությունը թույլ է տալիս իրականացնելու Իրանի Իսլամական Հանրապետության հետագա մեկուսացումը: Այս դեպքում իրանական ազգային փոխադրող «Iran Air» ընկերությունը հնարավորություն չի ունենալու վերալիցքավորվելու եվրոպական մի շարք կարեւոր օդանավակայաններում: Այս ամենն արվում է «միջուկային» ծրագրի հետ կապված մտցված պատժամիջոցների շրջանակներում:
Այդ համաձայնագրի տակ իրենց ստորագրություններն են դրել այնպիսի ընկերություններ, ինչպիսիք են ֆրանսիական «Total»-ը, նորվեգական «Statoil»-ը, իտալական «Eni»-ն, ինչպես նաեւ բրիտանական եւ հոլանդական «Royal Dutch Shell»-ը:
«Iran Air»-ի օդանավերը, որոնք ուղեւորվում են Ամստերդամ, Լոնդոն, Ստոկհոլմ, ստիպված են լինելու վերալիցքավորվել Գերմանիայի եւ Ավստրիայի օդանավակայաններում, որոնք դեռ չեն մտցրել այդ արգելքը: Սպասվում է, որ այդ 4 ընկերություններին կհետեւեն եվրոպական մյուս ընկերությունները եւս: