НТВ հեռուստաալիքի կիրակնօրյա վերլուծական հաղորդման ժամանակ ՀՀ երկրորդ նախագահ Ռոբերտ Քոչարյանն անդրադարձել է Հայաստանում տեղի ունեցող դեպքերին և նշել. «Իշխանությունը ճամպրուկ չէ, որ ինչ-որ մեկն այն վերցնի ու փոխանցի Նիկոլ Փաշինյանին: Ստիպել, շանտաժ անել մարդկանց մեծ քանակով, ստիպել նրանց գնալ սեփական խղճի, հայացքների, քաղաքականության մասին ունեցած պատկերացումների դեմ, կարծում եմ, սա լիովին այլ ծայրահեղություն է»:
Իհարկե, սա առաջին դեպքը չէ, երբ Ռոբերտ Քոչարյանը հանդես է գալիս նման տոնայնությամբ, այսպես կոչված` «միակ տղամարդու» կերպարի մեջ: Սակայն ուշագրավ է, որ տևական ընդմիջումից հետո, երբ Քոչարյանը փաստացի դուրս էր դրվել խաղից, նա մանիպուլիատիվ ոճով խոսում է հիմա` հայաստանյան դրամատիկ իրադարձությունների ֆոնին:
Աչքի է զարնում այն հանգամանքը, որ երկրորդ նախագահը հարցազրույց է տալիս ոչ թե տեղական լրատվամիջոցի, այլ` հեղինակավոր ռուսական հեռուստաընկերության: Նա, թերևս, իր մասին փորձում է հիշեցնել մոսկովյան վերնախավին` գուցե համարելով, որ Սերժ Սարգսյանի հեռացումով իր համար հետդարձի ճանապարհ է բացվել, մանավանդ, որ ՀՀԿ-ում քիչ չեն մարդիկ, ովքեր «տոլերանտ» Սերժ Սարգսյանի ֆոնին երանությամբ հիշում են Քոչարյանի «երկաթե ձեռքի» մասին:
Մյուս կողմից` Ռոբերտ Քոչարյանի հարցազրույցի մյուս հասցեատերն ակնհայտորեն Նիկոլ Փաշինյանն է, ում երկրորդ նախագահը հասկացնում է, որ իշխանությունը վերցնելու համար բավարար չէ միայն Սերժ Սարգսյանի հետ պայմանավորվելը. անհրաժեշտ է պայմանավորվել նաև իր հետ:
Իհարկե, Ռոբերտ Քոչարյանի մոտ խոսում է նաև ինքնապաշտպանության բնազդը: Երկրում էապես փոխվել է քաղաքական ստատուս-քվոն, Հայաստանը կանգնած է վերջին երեսուն տարիներին ամենամասշտաբային փոփոխությունների շեմին, ինչը, բնականաբար, չեղարկում է պայմանավորվածությունների, երաշխիքների համակարգը: Այս ամենը Քոչարյանի մոտ լուրջ մտահոգություններ է ծնում, մանավանդ` դեռ մինչև թավշյա հեղափոխությունն արդեն իսկ օրակարգ էր եկել Մարտի 1-ի գործով Ռոբերտ Քոչարյանին հարցաքննելու պահանջ: Եթե մինչև դրամատիկ իրադարձությունները «Ելք» խմբակցության ղեկավար Նիկոլ Փաշինյանը նման միջնորդություն էր ներկայացնում գլխավոր դատախազին, ապա հիմա անհամեմատ մեծանալու են վարչապետ Նիկոլ Փաշինյանի գործնական հնարավորությունները:
Լուսանկարը՝ 2rd.am-ի