Դիսկուրս չկա՝ վարչապետ դառնալու է Սերժ Սարգսյանը. Կոլերով

«Առաջին լրատվական»-ի զրուցակիցն է «Ռեգնում» լրատվական գործակալության գլխավոր խմբագիր, քաղաքական վերլուծաբան Մոդեստ Կոլերովը։

-Պարոն Կոլերով, ավարտվեց Սերժ Սարգսյանի նախագահության ժամկետը, և Հայաստանը լիարժեք անցում է կատարում կառավարման խորհրդարանական համակարգին։ Շատերի կարծիքով՝ հենց Սերժ Սարգսյանը կստանձնի վարչապետի պաշտոնը։ Մոսկվան այս առումով ունի՞ նախընտրություններ։

-Մոսկվան որևէ նախընտրություն չունի։ Երկրորդ՝ այդպիսի հարց դրված չէ՝ այսինքն՝ չկա այդպիսի հարցադրում՝ ո՞վ կդառնա վարչապետ։ Վարչապետ դառնալու է Սերժ Սարգսյանը։ Ընդհանրապես այդպիսի դիսկուրս գոյություն չունի։

-Կարծում եք՝ Սարգսյանի վարչապետ դառնալը կլինի անկախ այն հանրահավաքներից ու բողոքի միջոցառումներից, որ այսօր նախաձեռնում են ընդդիմադիր քաղաքական ուժերն ու քաղաքացիական նախաձեռնությունները։

-Այո՛, դա կլինի անկախ ձեր նշած գործողություններից։ Դրանք ոչ մի բանի վրա ազդել չեն կարող։

-Իսկ գործող վարչապետ Կարեն Կարապետյանի հետագա ճակատագրի մասին ի՞նչ կասեք. նա ավելի վաղ հայտարարել էր, որ ցանկություն ունի պաշտոնավարել նաև ապրիլից հետո։

-Ես կարծում եմ, որ տրամաբանական կլինի, եթե նա լինի առաջին փոխվարչապետ։ Հայաստանի կառավարման նոր համակարգում վարչապետը, փաստորեն, պետության առաջին դեմքն է և նա, բացի տնտեսական հարցերից, նաև շատ քաղաքական հարցերի համար է պատասխանատու։ Տրամաբանական կլինի, եթե տնտեսական հարցերով զբաղվի Կարեն Կարապետյանը։ Դա պարզապես իմ վերլուծությունն է, ես որևէ կոնկրետ ինֆորմացիա չունեմ։

-Պարոն Կոլերով, Հայաստանում կան նախաձեռնություններ, որոնք բավականին ռադիկալ տրամադրություններ ունեն։ Շատերը չեն բացառում, որ կկրկնվի 2016 թվականլի հուլիսի սցենարը՝ խոսքը «Սասնա ծռերի» գործողության մասին է։ Այդպիսի սցենարի կրկնություն հնարավոր համարո՞ւմ եք։

-Անկեղծ ասած՝ այդ հարցին չեմ կարող պատասխանել, չգիտեմ։

-Պաշտոնական Բաքուն այս ընթացքում մի քանի հայտարարություն արեց, այդ թվում՝ նշվեց, որ Հայաստանում և Ադրբեջանում ընտրական փուլի ավարտից հետո որոշակի տեղաշարժեր են հնարավոր կարգավորման ուղղությամբ։ Դուք այդպիսի հնարավորություն տեսնո՞ւմ եք։

-Ո՛չ, ես չեմ կարծում, որ Ղարաբաղյան հակամարտության կարգավորման ուղղությամբ առաջընթաց հնարավոր է։ Մինչև բանակցությունների սեղանին չվերադառնա հենց Լեռնային Ղարաբաղը՝ այնպես, ինչպես մինչև 1997 թվականն էր։ Բանակցություններն ըստ էության վերացել են, այժմ երկկողմ կոնսուլտացիաներ են տարվում։ Իմ կարծիքով՝ բանակցությունները հունի մեջ կընկնեն միայն այն ժամանակ, երբ հենց Լեռնային Ղարաբաղը վերադառնա բանակցությունների սեղանին։

-Դուք կարծում եք՝ այդ ուղղությամբ քայլեր արվո՞ւմ են։

-Ես գիտեմ, որ Մինսկի խմբի համանախագահները հակված են դրան։ Բայց նրանք միայն միջնորդներն են, դա կախված կլինի կողմերի քաղաքական կամքից։