«Քվեարկել են Ռուսաստանի քաղաքացիները՝ ազգությունը որևէ կապ չունի, կատարել են իրենց ընտրությունը՝ ելնելով իրենց ցանկություններից, սպասելիքներից ու աշխարհահայացքից։ Ես մշտապես նեղվում եմ այդ «հայ» բառից, կարծում եմ՝ վաղուց արդեն ժամանակն է, որ մենք առաջնորդվենք հայաստանցի, ՀՀ քաղաքացի բառով»,- անդրադառնալով Հայաստանում ՌԴ դեսպանատան մոտ՝ Ռուսաստանի նախագահական ընտրությունների օրը գոյացած հերթին, ասաց Հովհաննես Թումանյանի անվան տիկնիկային թատրոնի տնօրեն Ռուբեն Բաբայանը։
Բաբայանը հավելում է. «Քանի մենք չենք ազատվում այդ «հայ» բառը օգտագործելու թվացյալ պարտականություններից, մենք շատ ծանր ենք տանելու նման իրադարձությունները։ Պարզ է, որ իրենք պետք է առաջնորդվեին իրենց ու իրենց երկրի շահերով՝ այնպես, ինչպես իրենք են պատկերացնում։ Իրենք բացարձակապես որևէ պարտավորություն չունեն Հայաստանի Հանրապետության առջև միայն նրա համար, որ ազգությամբ հայ են։ Պարտավորություններ ունի միայն երկրի քաղաքացին։ Կարծում եմ, որ սա շատ տրամաբանական է, և ես հիմա հեծանիվ չեմ հնարում»։
Մեր զրուցակիցը նշում է՝ մեր հասարակությունը դժվար է տեղավորվում երկրի քաղաքացի հասկացության մեջ. «Շատ ավելի հեշտ է ազգի հանդեպ կատարել պարտավորություններ, քան երկրի։ Բազմաթիվ մարդկանց եմ ճանաչում, որոնք ամենաճոռոմ ելույթներն են ունենում հայ ազգի, ազգային գաղափարների մասին, բայց գրպանում ունեն Ռուսաստանի անձնագիր։ Եկեք շատ կոնկրետ տարանջատենք՝ դու ՀՀ քաղաքացի՞ ես, թե՞ ոչ։ Եթե քաղաքացի ես, ապա ունես շատ կոնկրետ պարտավորություններ երկրի ճակատագրի, զարգացման ու ուղիների համար։ Ես կարող եմ, յուրաքանչյուր քաղաքացու հետ պատրաստ եմ մտնել շատ հարգալից բանավեճի մեջ։ Բայց ես բացարձակապես ցանկություն չունեմ ուրիշ երկրի քաղաքացու հետ մտնել բանավեճի մեջ, որովհետև ես չեմ խառնվում այդ ուրիշ երկրի ներքին հարցերին ու քաղաքականությանը։ Կգերադասեի, որ ուրիշ երկրի քաղաքացիները՝ անկախ իրենց ազգային պատկանելությունից, չխառնվեն իմ երկրի ներքին գործերին ու արտաքին քաղաքականությանը»։
Բաբայանը եզրափակում է. «Այդ մարդիկ գնացել իրենց պարտքն են կատարել իրենց հայրենիքի հանդեպ։ Դա իրենց հայրենիքն է, եկեք այդպես ընկալենք ու մեզ այդ ժամանակ շատ լավ կզգանք»։
Հարցազրույցն ամբողջությամբ՝ տեսանյութում։