Հայաստանում ԱՄՆ դեսպանն ու Հայաստանի գլխավոր դատախազը մարտի 5-ին հանդես են եկել հայտարարությամբ, որն առնչվում է միջազգային հետախուզման մեջ գտնվող և 2017-ի դեկտեմբերին Հայաստանում ձերբակալված անձին ԱՄՆ արտահանձնելու որոշմանը, որ կայացրել է Հայաստանը: Խոսքը ԱՄՆ քաղաքացու մասին է, որը մեղադրվում է երեխայի հանդեպ սեռական ոտնձգության երեք դրվագով, և որը իրավապահների հետապնդումից թաքնվելու համար փախել է Հայաստան: Հայաստանում նա հայտնաբերվել է և փաստորեն արտահանձնվել ԱՄՆ-ին:
«Միջազգային հետախուզման մեջ գտնվող անձինք հաճախ լուրջ սպառնալիք են ներկայացնում հանրության անվտանգությանը»,- ասել է Ռիչարդ Միլսը։ «Մենք գնահատում ենք ՀՀ գլխավոր դատախազության և ՀՀ իրավապահ մարմինների աշխատակիցների հետ սերտ համագործակցությունը՝ անձին այդքան արագ հայտնաբերելու, ձերբակալելու և հանձնելու ուղղությամբ ցուցաբերված աջակցության հարցում»,- այդ կապակցությամբ հայտարարել է ԱՄՆ դեսպանը:
Տեղի ունեցածը հնարավոր էր դիտարկել պարզապես ընթացիկ իրավակիրառական պրակտիկայի և միջպետական հարաբերության շրջանակում, որը անկասկած ունի քաղաքական կնիք այնքանով, որքանով խոսքը Հայաստանի Հանրապետության և գերտերության հարաբերության մասին է: Սակայն կա մի հանգամանք, որը տեղի ունեցածը ու նաև ԱՄՆ դեսպանի գնահատականը դնում է խիստ ուշագրավ մի լույսի ներքո:
Օրերս տեղեկություն տարածվեց, որ Հայաստանի իրավապահները հետախուզում են հայտարարել ԱՄՆ քաղաքացի Ռոբերտ Քուրքյանի նկատմամբ: Մի քանի ամիս առաջ ԱԱԾ-ն տարածեց հաղորդագրություն, որ բացահայտվել է Ֆեյսբուք սոցցանցի միջոցով ահաբեկչական խումբ հավաքագրելու գործ, ըստ որի՝ Ռ. Ք.-ն Հայաստանում ահաբեկչություններ կազմակերպելու համար հավաքագրում է հայաստանցի և արտերկրի հայկական շրջանակներից համախոհների: Ըստ այդ հաղորդագրության՝ Ռոբերտ Քուրքյանը ԱՄՆ քաղաքացի է, և ԱԱԾ-ն հայտարարում էր, որ ԱՄՆ իրավապահներին տեղեկացրել են այդ մասին և հայտնել նրա կոորդինատները, բնակության վայրի մասին տվյալներ: Եվ ահա, մի քանի շաբաթ առաջ հայտարարվեց, որ նրա հանդեպ հայտարարվել է հետախուզում:
Որտե՞ղ է Ռոբերտ Քուրքյանը՝ ԱՄՆ-ո՞ւմ, թե՞ ոչ, բայց բոլոր դեպքերում Հայաստանում հայտնաբերված և հետախուզվող ԱՄՆ քաղաքացուն արտահանձնելու որոշման մասին այսօր տարածված տեղեկությունը խիստ ուշագրավ է դառնում ԱՄՆ քաղաքացի Ռոբերտ Քուրքյանի հանդեպ Հայաստանի իշխանության հայտարարած հետախուզման ֆոնին: Հայաստանը կատարում է մի քայլ, որն արժանանում է ԱՄՆ բարձր գնահատականին, և թերևս սպասում, որ ԱՄՆ-ը համարժեք կգործի արդեն Հայաստանի հայտարարած միջազգային հետախուզման մեջ գտնվող իր քաղաքացու գործում:
Հատկանշական է, որ իրադարձությունների այդ զարգացումը նման խոսուն աշխուժության փուլ է մտնում Հայաստանում իշխանության ձևավորման և կառավարման մոդելի անցումային ներկայիս վճռորոշ մարտ-ապրիլյան շրջանում, երբ հայտնի դարձավ նոր նախագահը և մոտ մեկ ամիս անց պարզ կլինի նոր վարչապետի անունը: Այդ ընթացքում Հայաստանը անկասկած մի կողմից՝ մտնում է գրեթե որևէ մեկի մոտ կասկած չհարուցող զարգացումների, մյուս կողմից, սակայն, անկասկած անկայունության և անկանխատեսելիության ռիսկերի փուլ: Հայաստանն այդ հարցում ակնհայտորեն փորձում է ստանալ ԱՄՆ աջակցությունը:
