Նյու Յորքի ամենաթանկարժեք տունը վաճառվել է ռեկորդային 100,47 միլիոն դոլարով, սակայն մինչև այժմ գնորդի ինքնությունը գաղտնի էր պահվում։ Վերջապես Wall Street Journal–ը տեղեկացրել է, որ էլիտար անշարժ գույքը պատկանում է Dell Inc.-ի հիմնադիր և գլխավոր գործադիր տնօրեն Մայքլ Դելլին։ Bloomberg-ի վարկանիշի համաձայն, տեխնիկական մագնատի անձնական կարողությունը 21,6 միլիարդ դոլար է և նա 40-րդ տեղն է գրավում աշխարհի ամենահարուստ մարդկանց վարկանիշային աղյուսակում։
Իր առաջին 2 հազար դոլարը Դելլը վաստակել է դրոշմանիշների վերավաճառքով, իսկ 19 տարեկանում հիմնել է Dell-ը։ Այժմ կորպորացիայի տարեկան շրջանառությունը 62 միլիարդ է կազմում։
Դելլի նոր ձեռբերումը գտնվում է այսպես կոչված միլիարդատերերի շարքի 57-րդ փողոցում։ 10923 ft² մակերեսով տունը վեց ննջարան և վեց լողասենյակ ունի, իսկ նրա հսկայական պատուհաններից տեսարան է բացվում դեպի Կենտրոնական պուրակ և Իսթ–Րիվեր։