«Երևանի ավագանու «Ելք» խմբակցությունը ոչ մի պարագայում չի համակերպվելու քաղաքապետարանի որոշման հետ։ Մենք հայտարարություն ենք տարածել, որտեղ հստակ ամրագրել ենք, որ ավագանու նիստերին լրագրողների մուտքի արգելքը խոչընդոտելու է ավագանու նիստերի հրապարակայնությանը և բերելու է նրանք, որ քաքաղաքապետարանը ստանձնելու է նիստերի լուսաբանման մենաշնորհը»,-«Առաջին լրատվական»-ի հետ զրույցում ասաց «Ելք» խմբակցության ղեկավար Դավիթ Խաժակյանը։
Նրա խոսքով, եթե քաղաքապետը կայացնի այնպիսի որոշում, որ կհակասի օրենսդրության պահանջներին, իրենք պատրաստ են վիճարկելու քաղաքապետի որոշումը դատական կարգով։
Դավիթ Խաժակյանի խոսքով, եթե քաղաքապետարանը որոշի փակել նիստերը լրագրողների համար, ապա դա կդիտվի ոչ միայն ավագանու նիստերի հրապարակայնության խոչընդուտում, ոչ միայն լրագրողների աշխատանքի խոչընդոտում, այլև իրենց՝ ավագանու անդամների գործունեության լուսաբանման խոչընդոտում։
Դավիթ Խաժակյանը նաև նշեց, որ իրենք վստահություն չունեն քաղաքապետարանի ուղիղ եթերների մասով, քանի որ բազմիցս հենց «Ելք» խմբակցության անդամների ելույթների ժամանակ այդ ուղիղ հեռարձակումը «խափանվել» է։ «Մենք վստահություն չունենք քաղաքապետարանի ապահոված ուղիղ եթերների նկատմամբ։ Անձամբ ենք համոզվել, որ բազմիցս իրենք ընդհատել են հեռարձակումը։ Այս առումով լրատվամիջոցների ներկայությունը շատ կարևոր է, ընդ որում ոչ միայն ավագանու նիստերի հետին մասում։ Եթե լինի տեխնիկական խոտան, ապա դահլիճում գտնվող լրատվամիջոցները այդ խոտանի պահին կկարողանան ապահովել պատշաճ ուղիղ հեռարձակում»,-նշեց Խաժակյանը։
«Ելք» խմբակցության ղեկավարը նշեց, որ եթե քաղաքապետարանի կողմից կայացվի ավագանու նիստերը փակելու որոշումը, իրենք բացի դատական կարգով բողոքարկելուց ունեն նաև այլ գործիքներ քաղաքապետարանի նիստերի դահլիճ մուտքի ապօրինի արգելքը շրջանցելու համար։
Առավել մանրամասն՝ տեսանյութում