Հյուսիսային պողոտա 11 հասցեում այսուհետեւ կգործի «XIAOMI» ապրանքանիշի պաշտոնական խանութ-սրահ: Այստեղ երեւանյան գնորդը կարող է գտնել հեռախոսների, պլանշետների, լիցքավորման մարտկոցների, ինտերնետային երթուղիչների, ականջակալների, աքսեսուարների բազմազան մոդելներ՝ անմիջապես արտադրողից:
«Բարձրակարգ տեխնիկան կարող է լինել հասանելի բոլորի համար»,- սա է «XIAOMI» ապրանքանիշի նշանաբանը, որով կարճ ժամանակում միջազգային ապրանքատեսակը կարողացավ ռեկորդային արագությամբ գրավել բարձր տեխնոլոգիաների, հատկապես հեռախոսների շուկան: Այսօր արդեն «XIAOMI» -ն 60 երկրում խանութներ ունի: Երեւանյան խանութի բացմանը ներկա էր «XIAOMI»-ի պաշտոնական ներկայացուցիչ, «Սմարթ օրանժ» ընկերության գլխավոր տնօրեն Անտոն Սվիրիդովոը: Նա նշեց, որ ԱՊՀ –ի տարածքում խանութների թվով Հայաստանը 55-րդն է:
«Այս օրերին «XIAOMI» ապրանքանիշի նոր խանութներ կբացվեն նաեւ Ռոստովում, Բիշքեկում, Կրասնոդարում: Գրեթե ամեն շաբաթ մենք մեկ-երկու խանութ ենք բացում Ռուսաստանում եւ ԱՊՀ երկրներում»,- ասաց Անտոն Սվիրիդովը:
Հյուսիսային պողոտա 11 հասցեում գործող «XIAOMI» խանութ սրահում շուտով կսկսի գործել նաեւ տեխնիկական սպասարկման կենտրոն, որտեղ մասնագետները կսպասարկեն ոչ միայն պաշտոնական խանութի գնորդներին, այլեւ՝ «XIAOMI»-ի բոլոր երկրպագուներին: Իսկ մոտ ապագայում ընկերության հեռանկարն է բացել պաշտոնական ինտերնետ – խանութ Հայաստանում:
«XIAOMI»-ի երեւանյան մասնաճյուղի խանութ-սրահի անձնակազմն անցել է վերապատրասման դասընթացներ եւ հմտացած է ապրանքանիշի մոդելների առանձնահատկությունները ներկայացնելու հարցում: Այստեղ կգործի գնային ճկուն համակարգ, գնորդը հնարավորություն կունենա «XIAOMI» -ի բոլոր մոդելները ձեռք բերել մատչելի գնով, ապառիկ եւ կանխիկ տարբերակով:
