Մյունխենի անվտանգության համաժողովում ԵՄ-ի հետ համագործակցության և ԵԱՏՄ անդամակցության Հայաստանի փորձը օրինակելի անվանեցին: Հայաստանի փորձը դրական գնահատվեց թե Ռուսաստանի, թե ԵՄ ներկայացուցիչների կողմից։
Համաժողովի ընթացքում, որին մասնակցում էր նաև ՀՀ Նախագահ Սերժ Սարգսյանը, Ռուսաստանի Դաշնային խորհրդի միջազգային հարցերով հանձնաժողովի նախագահ Կոնստանդին Կոսաչևն ընդգծեց, որ ԵԱՏՄ-ին Հայաստանի անդամակցությունը և Եվրոպական Միության հետ համագործակցության նոր համաձայնագրի ստորագրումը գերազանց օրինակ է, թե ինչպես կարելի է հարթել խնդիրները:
«Սա շատ լավ փորձ է: Սա ընդհանրապես նման առաջին փորձն է»,- ասաց Կոսաչևը: Նա շեշտեց, որ հպարտանում են Հայաստանով, որը կարողացավ նման առաջընթաց գրանցել՝ առանց խնդիրներ ստեղծելու իր համար ու Եվրասիական տնտեսական միության և Եվրոպական Միության հետ համագործակցության առումով: Կոսաչևն ընդգծեց, որ Եվրասիական տնտեսական միությունը երիտասարդ կառույց է, որը զարգանում է և լայն հնարավորությունն է ստեղծում անդամ պետությունների համար՝ շեշտելով, որ ուրախ կլիներ տեսնել ավելի լավ համագործակցություն ԵԱՏՄ-ի և ԵՄ-ի միջև: ԵՄ հարեւանության քաղաքականության եւ ընդլայնման հարցերի հանձնակատար Յոհաննես Հանն էլ նշեց, որ Հայաստանի փորձը լավ օրինակ է. պետք է համաձայնեցնել համագործակցության ուղիները, եթե երկիրը համագործակցության պայմանագիր ունի այլ միջազգային կառույցի հետ:
«Հետևաբար, ամեն ինչ չէ, որ հնարավոր է: Մենք պետք է հաշվի առնենք նաև այլ գործընկերների հետ համաձայնագրերը: Հետևաբար Հայաստանի և Եվրոպական Միության միջև համաձայնագիրը իր բովանդակությամբ տարբերվում է ազատ և համապարփակ առևտրի համաձայնագրից: Այս ամենը պետք է վերլուծվի: Մեզանից 2 տարի պահանջվեց, որպեսզի հստակեցնենք այն ուղղությունները, որտեղ մենք կարող ենք համագործակցել»,- ասաց Հանը: Յոհաննես Հանը նույնպես նշեց, որ ցանկանում են համագործակցեն ԵԱՏՄ հետ: Նրա խոսքով՝ ապրելով բազմաբևեռ հասարակությունում, իրենք ցանկանում են համագործակցել բոլորի հետ։
