Թուրքիան խոչընդոտում է ծովային հանքավայրի հորատման աշխատանքների իրականացմանը Կիպրոսի Հանրապետության բացարձակ տնտեսական գոտիում։ Էրդողանը սպառնում է նավթային կազմակերպություններին։ Եվրոպական հանձնաժողովը ուշադիր հետևում է Էգեյան ծովում լարված իրավիճակի զարգացումներին, որտեղ թուրքական ռազմա–ծովային ուժերի նավերը խոչընդոտում են հորատման աշխատանքների իրականացմանը՝ գազի ծովային հանքավայրում։ Այս մասին փետրվարի 13-ին հայտարարել է ԵՀ պաշտոնական ներկայացուցիչ Մարգարիտիս Սխինասը։
«Մենք պնդում ենք, որ Թուրքիան պետք է կատարի բարիդրացիական հարաբերությունների պարտավորությունները և զերծ մնա ԵՄ անդամ երկրների հետ ցանկացած միջադեպերից։ Մենք նաև ցանկանում ենք ընդգծել անդամ–պետությունների ինքնիշխանությունը հարգելու անհրաժեշտությունը՝ իրենց տարածքում, ներառյալ ծովային և օդային տարածքները։ Պետք է նաև խուսափել բացասական հայտարարություններից, որոնք վտանգում են բարիդրացիական հարաբերություները»,– ընդգծել է նա։
Ավելի վաղ, նույն օրը, Թուրքիայի նախագահ Ռեջեփ Թայիպ Էրդողանը զգուշացրել է Կիպրոսի ծոցում աշխատանքներ իրականացնող միջազգային նավթային կազմակերպություններին։ «Մի կարծեք, թե ձեր՝ գազ փնտրելու փորձերը Կիպրոսի ափին մեր ուշադրությունից կվրիպեն։ Մենք զգուշացնում ենք բոլորին, ովքեր անցնում են Կիպրոսի սահմանները՝ սխալ որոշումներ կայացնելուց»,– ասել է Էրդողանը։
Իրավիճակը շարունակում է շիկանալ։ Փետրվարի 13-ի գիշերը բախում է տեղի ունեցել հունական և թուրքական ափային պահակախմբի նավերի միջև՝ Էգեյան ծովում, վիճելի Իմիա (Քարդակ) կղզիների մոտ։
Միջադեպի արդյունքում նավաստիներից ոչ ոք չի տուժել։