Հայաստանի իշխող Հանրապետական կուսակցության կողմից առաջադրված նախագահի թեկնածու Արմեն Սարգսյանն այս օրերին հանդիպումներ է անցկացնում Հայաստանում և Սփյուռքի գաղթօջախներում։ Այսօր խորհրդարանի ընդդիմադիր «Ելք» դաշինքի հետ հանդիպումից հետո էլ Սարգսյանը մեկնել է Լեռնային Ղարաբաղ։ Հատկանշական է, Արմեն Սարգսյանը մինչ այսօր չի եղել Հայաստանի ոչ մի համայնքում, չի ծանոթացել և ոչ մի համայնքի իրական, հանապազօրյա խնդիրների հետ, փոխարենը, սակայն, հասցրել է հանդիպել Մեծ Բրիտանիայի, Ռուսաստանի Դաշնության, Ֆրանսիայի, Իտալիայի հայ համայնքների հետ։ Այնուամենայնիվ, ինչու Սերժ Սարգսյանը կանգ առավ Արմեն Սարգսյանի թեկնածության վրա։ Հարցը դեռևս չի ստացել ամբողջական և համոզիչ պատասխան։ Կկարողանա՞ իր գիտակցական կյանքի կարևոր հատվածն արտերկրում ապրած Արմեն Սարգսյանը որակական հակակշիռ ստեղծել Հայաստանում արմատացած քրեաօլիգարխիկ համակարգին։ Ինչ օրակարգով և ինչ պայմաններում Արմեն Սարգսյանին կհաջողվի կյանքի կոչել իր ծրագրերը։
Թեման քննարկելու ենք Լոնդոնի Jane’s Intelligence պաշտպանության և անվտանգության հարցերով վերլուծական կենտրոնի ԱՊՀ-ի և Ռուսաստանի հարցերով առաջատար վերլուծաբան Լիլիթ Գևորգյանի հետ։ Լիլիթը բնակվում է Լոնդոնում, նրա հետ կապ ենք հաստատել տեսակապի միջոցով։