Նախագահի թեկնածու, իհարկե դեռևս պաշտոնապես չառաջադրված Արմեն Սարգսյանը «Ելք» խմբակցության հետ հանդիպումից հետո պատասխանելով լրագրողների հարցերին՝ հայտարարել է, որ կլինի Չորրորդ հանրապետության առաջին նախագահը: Առաջին հայացքից սա հռետորաբանություն կամ բառախաղ է, իրականում, սակայն, Արմեն Սարգսյանն այդպիսով անում է իր առաջին հրապարակային քաղաքական լուրջ հայտարարությունը:
Զուտ նոմինալ առումով, իհարկե, չորրորդ հանրապետության իշխանությունն ավելի շատ գտնվելու է չորրորդ հանրապետության առաջին վարչապետի, քան առաջին նախագահի ձեռքին, բայց մյուս կողմից՝ Արմեն Սարգսյանն իր հայտարարությամբ դե ֆակտո փորձում է դնել, այսպես ասած, խոսքի իշխանության հիմք, առնվազն իր խոսքի: Այստեղ է չորրորդ հանրապետություն տերմինը շրջանառության մեջ դնելու իմաստը, այսինքն՝ Արմեն Սարգսյանը հանրությանն առաջարկում է իրականության չափման լիովին նոր միավոր: Կհամաձայնի՞, կընդունի՞ հանրությունը դա, թե՞ ոչ՝ այլ հարց է իհարկե, սակայն առաջարկը բավականին հստակ է և հստակ է նաև խորքային նպատակն այդ առաջարկի: Դա ոչ թե զրոյից կամ մաքուր էջից սկսելու առաջարկ է հասարակությանը, այլ նաև գործնականում իշխող համակարգից հրապարակային մակարդակում տարանջատվելու ժեստ և հռետորաբանության նոր նշաձողի սահմանում առաջին հերթին այդ համակարգի հետ, այսպես ասած, տարբեր լեզուներով խոսելը ի ցույց դնելու և միևնույն ժամանակ իշխող համակարգին իր լեզուն պարտադրելու համար:
Բոլոր դեպքերում, Արմեն Սարգսյանը սահմանում է նշաձող, որի պատասխանատվության տակ է, և նա առնվազն իր գործունեությունը պետք է համապատասխանեցնի իր իսկ սահմանած իրականությանը՝ Չորրորդ հանրապետություն: Եթե Արմեն Սարգսյանին չհաջողվի դնել խոսքի իշխանության հիմք նույնիսկ մինչև պաշտոնապես նախագահ դառնալը, ապա նա բացարձակապես ի զորու չի լինի արդյունավետ իրացնել իր այն դիվանագիտական և կապիտալի ռեսուրսը, ներուժը, որը նրան կշիռ է հաղորդելու հայաստանյան նոր համակարգում և լինելու է այդ համակարգում նրա դերակատարության հենարանը:
Այդ իմաստով Չորրորդ հանրապետության առաջին նախագահը ըստ էության ծրագրային հայտարարություն և դեկլարացիա է, որն ըստ էության ավելորդ է դարձնում Արմեն Սարգսյանին ուղղված որևէ այլ հարց: Նա ըստ էության ասել է այն, ինչ պետք է ասեր նախագահի թեկնածուն: Այժմ պետք է պարզապես չափել այն, ինչ պետք է անի չորրորդ հանրապետության առաջին նախագահը: Այսինքն՝ նրա պաշտոնական ամեն խոսքում ու գործում հանրությունը պետք է չափի, շոշափի և ճանաչի չորրորդ հանրապետությունը: Եթե ոչ, ապա Արմեն Սարգսյանը չորրորդ հանրապետության առաջին նախագահը դառնալու փոխարեն՝ պարզապես կդառնա չորրորդ հանրապետության առաջին «քաղաքական զոհը»: