«Ես իմ կարծիքը չեմ փոխել՝ Սերժ Սարգսյանը ՀՀ վարչապետ չի դառնալու։ Նա կստանձնի այդ պաշտոնը միայն մի դեպքում, երբ աշխարհի գերտերությունները՝Ռուսաստանը, ԱՄՆ-ը, Ֆրանսիան գան կոնսենսուսի Ղարաբաղի հարցի շուրջ ու ստիպեն Սերժ Սարգսյանին դառնալ վարչապետ։ Այդ կոնսենսուսը ես այսօր չեմ տեսնում»,- «Առաջին լրատվական»-ի հետ զրույցում նման տեսակետ հայտնեց «Ոտքի՛, Հայաստան» նախաձեռնության անդամ Դավիթ Հովհաննիսյանը։
Նրա կարծիքով՝ առաջիկայում անակնկալներ հնարավոր են. «Մոտ մեկ ամսից և՛ ներքին, և՛ արտաքին դաշտում լուրջ սյուրպրիզ ենք ունենալու, ու դրանից արդեն պարզ կդառնա՝ ով է լինելու վարչապետ»,-ասաց Հովհաննիսյանը։
Ինչ վերաբերում է ՀՀ 4-րդ նախագահի թեկնածու Արմեն Սարգսյանին, Դավիթ Հովհաննիսյանն առաջարկում է նրան երկու հարց ուղղել. «Հայաստանում կա՞ն քաղբանտարկյալներ, թե՞ ոչ՝ առանց անունների, բայց թող կոնկրետ պատասխան տա, դրանից շատ բան պարզ կդառնա։ Երբ դարձավ նախագահ, նա կաշկանդված կլինի, ուստի մինչև այդ պաշտոնը զբաղեցնելը պետք է ասի։ Եվ երկրորդ հարց՝ ի՞նչ կապ ունի Արմեն Սարգսյանը Վիրջինյան կղզիներում գոյություն ունեցող օֆշորում որոշ ՀՀ քաղաքացիների ընկերությունների և փողերի հետ, ի՞նչ տեղեկություն ու դերակատարություն ունի։ Այս երկու հարցի պատասխանից լայն հասարակությանը պարզ կլինի, թե այդ մարդն ով է»,- եզրափակեց նա։
Հարցազրույցն ամբողջությամբ՝ տեսանյութում։