Ադրբեջանի արտգործնախարար Էլմար Մամեդյարովն այսօր ընդունել է Պետդեպի՝ Եվրոպայի և Եվրասիայի հարցերով օգնականի տեղակալ Բրիջետ Բրինկի գլխավորած պատվիրակությանը, ասվում է ԱԳՆ հաղորդագրությունում։
Մամեդյարովն ընդգծել է ԵԱՀԿ Մինսկի խմբի մյուս համանախագահների հետ համատեղ ԱՄՆ-ի կողմից ջանքերի կրկնապատկման անհրաժեշտությունը՝ ուղղված ՄԱԿ ԱԽ բանաձևերին համապատասխան ԼՂ հակամարտության արդար կարգավորմանը։
Նախարարը նշել է, որ միջազգայնորեն ճանաչված սահմաններն ուժի կիրառմամբ խախտելու փորձերն անընդունելի են։
Արտգործնախարարն ընդգծել է, որ Ադրբեջանը հետաքրքրված է ԱՄՆ-ի հետ հարաբերությունների հետագա զարգացմամբ։
Խոսելով Ադրբեջանում անցկացվող արմատական տնտեսական բարեփոխումների մասին՝ նախարարը նշել է տնտեսական ոլորտում կապերի զարգացմանն ուղղված համատեղ ջանքերի ակտիվացման կարևորությունը, որպեսզի ամերիկյան ընկերություններն ավելի լայնորեն ներկայացվեն Ադրբեջանի ոչ նավթային ոլորտում։
Ընդգծելով երկու երկրների միջև ռազմավարական գործընկերությանն առնչվող քաղաքական երկխոսության ընդլայնման կարևորությունը՝ Բրինկն ասել է, որ ԱՄՆ-ն առանձնահատուկ նշանակություն է տալիս Ադրբեջանի հետ հարաբերություններին, նշել է երկկողմ համագործակցության հետագա զարգացման անհրաժեշտությունը։
Բրինկն առանձնահատուկ նշել է, որ բարձր է գնահատում Ադրբեջանի ներդրումն Աֆղանստանում խաղաղարար գործողություններում՝ ահաբեկչության դեմ պայքարի շրջանակում։
Զրույցի ընթացքում կողմերը քննարկել են կարևոր էներգետիկ և տրանսպորտային նախագծերը, որոնք իրականացվում են Ադրբեջանի նախաձեռնությամբ, մասնավորապես Բաքու-Թբիլիսի –Կարս երկաթուղին և «Հարավային գազային միջանցքը»։
Հանդիպման ժամանակ կատարվել է կարծիքների փոխանակություն երկուստեք հետաքրքրություն ներկայացնող հարցերի շուրջ։
Հանդիպմանը մասնակցել է ԵԱՀԿ Մինսկի խմբի ամերիկացի համանախագահ Էնդրու Շեֆերը։