Արարատ քաղաքի Շահումյան-2 հանրակացարանում բնակվող, 2010-ին բանակ զորակոչված նախկին զինծառայող Հովհաննես Վարդանյանը բանակում ստացած հոգեկան խանգարումից հետո շարունակում է բուժումը:
Հիշեցնենք, որ Հովհաննեսը բանակում ծառայել է մեկ տարի երկու ամիս, որից ութ ամիսն անցկացրել է դիրքերում: Ծառայության երկրորդ տարում Հովհաննեսին հոգեբուժարան են տեղափոխել: Հայրը որդուն գտել է հիվանդանոցում՝անճանաչելի վիճակում: Ինչպես Հովոն է պատմել հորը՝ սպան պահանջել է, որ Հովոն իրեն մասաժ անի, Հովոն հրաժարվել է… այդտեղից էլ սկսվել է ամեն ինչ:
Արդեն յոթ տարի է՝ ամսվա մեջ չորս անգամ Հովոն գալիս է Երևան՝ բժշկի: Սոցիալապես անապահով ընտանիքը նախկինում էլ է պարբերաբար դիմել պաշտպանության նախարարություն՝ Հովոյին Երևան բերելու համար ճանապարհածախսն ապահովելու համար:
Հայրը՝ Վարդան Վարդանյանը, «Առաջին լրատվական»-ի հետ զրույցում նշեց, որ պաշտպանության նախարարի փոփոխությունից հետո երկու անգամ նամակով դիմել է ՊՆ, բայց երկու անգամ էլ մերժում է ստացել:
ՊՆ պատասխան նամակում գրված է, որ կարող են միանվագ գումար հատկացնել ամուսնության, հիվանդանոց պառկելու ժամանակ և նաև մահվան դեպքում:
«Նախկինում տարվա համար գոնե 100.000 վճարում էին, ես էլ կարողանում էի տանել-բերել, բայց հիմա մերժում են: Պատասխանում գրել են, որ կարող են հիդանդանոցում վճարել, եթե վիրահատություն է, կամ աջակցել, եթե մահ է, բայց այս դեպքում չեն աջակցում: Կամ ասում են՝ եթե ուսանող ունեք, ուսանողի համար մենք կվճարենք»,- հավելեց Վարդան Վարդանյանը:
Նա նշեց, որ բուժող բժիշկը ուշադիր է Հովհաննեսի նկատմամբ, ամիսը մի քանի անգամ կանչում է, դեղերը փոխում, զրուցում է Հովոյի հետ:
Հովոն կորցրել է կյանքի նկատմամբ հետաքրքրությունը, տնից գրեթե դուրս չի գալիս, մեկուսացել է… Տան միակ աշխատողը հայրն է, սակայն ժամանակ առ ժամանակ նա էլ է անգործ մնում:
«Տրամադրությունը նույնն է, ոչինչ չի փոխվել… շարունակ ծխում է… Հովոյի թոշակը անգամ ծխախոտին չի հերիքում: Շատ-շատ է ծխում, քայլում է՝ ծխում, քայլում է՝ ծխում»,- ասաց Վարդան Վարդանյանը: Հովոն 40.000 դրամ թոշակ է ստանում, ինչը չի հերիքում անգամ Հովոյի ծխախոտին: Համոզված է՝ արտերկրում ինքը կառողջանա, իրեն կկարողանան բուժել, սակայն բուժումն արտերկրում կազմակերպելու համար նույնպես գումար չկա:
«Լրիվ անտարբերություն է, ինչի՞ մենակ Հովոյի հանդեպ, բոլորի հանդեպ է անտարբերություն…»,- հիասթափված նշեց Վարդան Վարդանյանը: