Անգլիացի նշանավոր կինոդերասան, սցենարիստ, երգահան և ռեժիսոր Չարլի Չապլինի դուստր Վիկտորիա Թիերե-Չապլինը և մեծն դերասանի թոռնուհի Աուրելիա Թիերեն կլինեն Հայաստանում: Վիկտորիա Թիերե-Չապլինի բեմադրած «Պատերի համր շշուկը» ներկայացումը մարտի 16-17-ին կներկայացվի Գ. Սունդուկյանի անվան ազգային ակադեմիական թատրոնում:
Ներկայացումը հայ թատրոնի բեմում կցուցադրվի Հայաստանի թատերական գործիչների միության հրավերով և ՀՀ մշակույթի նախարարության աջակցությամբ:
Ինչպես «Արմենպրես»-ի թղթակցին փոխանցել է Հայաստանի թատերական գործիչների միության նախագահ Հակոբ Ղազանչյանը, դերերում հանդես կգան Չապլինի թոռնուհի Աուրելիա Թիերեն, Ժեմ Մարտինեսը, Անտոնին Մորելը կամ Մագնուս Յակոբսոնը:
Ներկայացման երաժշտության հեղինակը Ֆիլիպ Գլասն է, գաղափարը, սցենարն ու բեմադրությունը պատկանում են Վիկտորիա Թիերե-Չապլինին, բեմադրության լուսային ձևավորումն իրականացրել է Թոմաս Դոբրուսկեսը, հագուստը՝ Վերոնիկա Գրանդի, Ժակ Պերդիգի, Մոնիկա Շվարցելի, Վիկտորիա Թիերե-Չապլինի, խորեոգրաֆիան` Վիկտորիա Թիերե-Չապլինի, Արմանդո Սանտինիի:
«Պատերի համր շշուկը» առեղծվածային համր ներկայացում է: Գլխավոր հերոսուհին անցնում է ժամանակի, տարածության և նույնիսկ պատերի միջով։ Լքված շենքերի վրա է բարձրանում, ներթափանցում գաղտնիքներով լեցուն սենյակներ, թույլ է տալիս, որ պատերը հսկեն ու հետևեն իրեն, իսկ պատերը յուրահատուկ են՝ ունեն ձեռքեր, շնչառություն, հոգի և հիշողություն: Գլուխը կորցրած Աուրելիան փախչում է հրաշքների երկիր, որն ասես ամայի Վենետիկն է: Նա երկրորդ կյանք է տալիս առարկաներին, խոսեցնում պատերին, թղթե գնդից արտասովոր հրեշ պատրաստում: Աուրելիայի կերպարն այնքան լուսավոր է ու անմեղ, որ չի կարողանում ընկալել, թե արտաքինը որքա ՞ն խաբուսիկ կարող է լինել:
Պար, ակրոբատիկա, ցնորք՝ պատերը կյանք են ստանում, գլխավոր հերոսուհին մերթ պարող պատերին ծափահարող հանդիսատեսն է, մերթ հենց ինքն է նրանց ներքաշում տեսիլային իրականություն: Իր երկու համախոհների հետ ժամանակից փախչողը կերպարանափոխվում է. թատերասերներին հրավիրում իր հետ միասին ճամփորդել դեպի աներեւակայելի աշխարհ: