Կիրակի, հունվարի 21-ին, Հորդանան այցից և թագավոր Աբդալայի հետ հանդիպումից հետո, երկօրյա պաշտոնական այցով Իսրայել է ժամանել ԱՄՆ փոխնախագահ Մայքլ Փենսը։ Նրա ինքնաթիռի վայրէջքից մի քանի րոպե առաջ Reuters գործակալությունը մեջբերել է Մայքլ Փենսին, ով, Աման կատարած այցի շրջանակներում, հայտարարել է, որ Հորդանանի թագավորի հետ իրենք պարզել են, որ Երուսաղեմի կարգավիճակի հարցում իրենց դիրքորոշումները չեն համընկնում։
Հունվարի 22-ի առավոտյան Փենսը կհանդիպի Իսրայելի վարչապետ Բինյամին Նեթանյահուի հետ։ Տեղի է ունենալու Քնեսեթի հատուկ նիստ՝ Մայքլ Փենսի մասնակցությամբ։ Արաբական միացյալ կուսակցության պատգամավորները հայտարարել են, որ բոյկոտելու են այս նիստը՝ ի նշան Երուսաղեմի հարցում Թրամփի քաղաքականության դեմ բողոքի։
Հունվարի 23-ին Մայքլ Փենսը կհանդիպի երկրի նախագահ Ռեուվեն Ռիվլինի հետ։
