Հայաստանից 5 զինծառայողներ վրացական Իմերեթի մարզի Սաչխերե քաղաքում ուսուցում են անցնում լեռնաուսումնական կենտրոնում՝ բազային կուրսի շրջանակում։ Այս մասին հայտնում է Վրաստանի ՊՆ-ն՝ փոխանցում է «Նովոստի Գրուզիան»։
Հայ զինվորականներից բացի, ուսումնական կուրս են անցնում նաև զինծառայողներ Վրաստանից, Լատվիայից և Լեհաստանից՝ ընդհանուր 12 մարդ։
Պարապմունքները մեկնարկել են այսօր և կշարունակվեն մինչև փետրվարի 2-ը։
Կուրսի շրջանակում զինվորականներին կսովորեցնեն կանգնել դահուկների վրա, հաղթահարել ձյունապատ ռելիեֆի խոչընդոտները և անցկացնել որոնողա-փրկարարական գործողություններ։ Նրանց կսովորեցնեն, թե ինչպես փնտրել և առաջին օգնություն ցույց տալ ձնահյուսքի տակ հայտնված մարդկանց, պատգարակով տարհանել տուժածներին և այլն։
Կուրսն անցնելուց հետո մասնակիցները թեստավորում կանցնեն։ Քննությունները հաջող հանձնելու դեպքում զինվորականները կպարգևատրվեն հավաստագրերով, կրծքանշաններով և կստանան առաջարկություն միջանկյալ ձմեռային կուրսի մասնակցելու համար։
2017 թվականի դեկտեմբերին ՀՀ նախագահ Սերժ Սարգսյանի՝ Թբիլիսի կատարած պաշտոնական այցի շրջանակում հայ գործընկեր Վիգեն Սարգսյանի հետ Վրաստանի պաշտպանության նախարար Լևան Իզորիայի հանդիպման ընթացքում վրացական կողմն առաջարկել էր հայկական կողմին մասնակցել լեռնաուսումնական կուրսին։
Լեռնաուսումնական դպրոցը հիմնադրվել է 2004 թվականին։ Ուսուցման կուրսի մշակմամբ զբաղվում է Ֆրանսիայի լեռնաուսումնական կենտրոնը։
