Թողարկվել է Եղիսաբեթ II-ի գահ բարձրանալու մասին BBC-ի փաստագրական ֆիլմի թրեյլերը, որտեղ բրիտանացի թագուհին պատմել է թագը կրելու անհարմարությունների մասին, որն իր մեծ քաշի պատճառով «կարող է վիզ կոտրել»։
«Ես չէի կարողանում գլուխս իջեցնել, որպեսզի կարդայի ելույթը թագադրման ժամանակ, քանի որ հասկանում էի, որ թագը կարող է կոտրել վիզս»,-պատմել է թագուհին։
Նշվում է, որ թագը կշռում է մոտ 1.3 կգ, քանի որ զարդարված է 2868 ադամանդներով, 17 շափյուղաներով, 11 զմրուխտներով և հարյուրավոր մարգարիտներով։
Ֆիլմի թրեյլերում թագուհին պատմել է թագադրումից այլ մանրամասներ։ Օրինակ՝ մարգարիտներով զարդարված, ոսկե և արծաթե թելերով կարված զգեստը պարզապես թույլ չի տվել իրեն նորմալ տեղաշարժվել՝ քաշի և երկարության պատճառով։
Հիշեցնենք, որ Եղիսաբեթ II-ի թագադրումը կատարվել է 1953 թվականի հունիսի 2-ին, երբ նա եղել է 27 տարեկան։
