Հունվարի մեկից մեկնարկած գնաճը սպեկուլյատիվ է, ակցիզային հարկի դրույքաչափի փոփոխությամբ պայմանավորված չէ։ Այս մասին «Առաջին լրատվական»-ի հետ զրույցում ասաց ԿԲ նախկին նախագահ, տնտեսագետ Բագրատ Ասատրյանը՝ հավելելով, որ, օրինակ, բենզինի գները 2017-ի ընթացքում տատանվել են՝ ցածրից մինչև թռիչքային բարձրացում։
«Իմ տպավորությունն այն է, որ տնտեսվարողները գները նախապես բարձրացրել էին, և թանկացումները, որ մենք կոնկրետ շուկայում ունեցանք, համարժեք չէին բենզինի միջազգային շուկայում տեղի ունեցող իրադարձություններին։ Ես բենզինի օրինակով եմ բացատրում, բայց երևույթը նույնական է. մեր շուկան նախապես պատրաստվել էր ակցիզային հարկի բարձրացմանը։ Եկավ հունվարի մեկը, և բոլորը կարծես մի հրահանգով գները բաձրացրին։ Կներեք, ես համոզված եմ ասում. հունվարի մեկից այս կողմ ընդամենը մի քանի լիտր բենզին է ներկրվել, այսինքն՝ ակցիզային հարկը աշխատելու տեղ չի էլ ունեցել։ Շուկայում այն, ինչ վաճառվում է, հիմնականում նախկին պահեստավորված, նախկին ակցիզային սակագներով շրջանառության մեջ դրվածն է։ Բարձրացումը այսքան շուտ չպետք է լիներ»։
Բագրատ Ասատրյանի դիտարկմամբ՝ իշխանությունները, կառավարությունը պետք է անհապաղ քայլեր ձեռնարկեն, արձակուրդները նրանց համար էլ են, բայց արդեն հունվարի 9-ն է, հիմա արդեն պարապուրդի են մատնված։
Բագրատ Ասատրյանի կարծիքով՝ հաշվի առնելով նման երևույթները՝ ԵԱՏՄ անդամակցությամբ պայմանավորված, ոչ թե 800 տեսակ ապրանքներ կթանկանան, այլ ավելի շատ, քանի որ տնտեսվարողները, անկախ նրանից՝ փոփոխությունները իրենց առնչվում են, թե չէ, կփորձեն լրացուցիչ եկամուտ ապահովել։
Բագրատ Ասատրյանի դիտարկմամբ՝ իշխանությունները շահարկում են այն, որ հայերը զուսպ են և գուցե սոցիալական բունտի չեն գնա. «Իշխանությունը չպետք է մտածի, քանի դեռ բունտ չկա, պետք է ապաշնորհ գործողությունները շարունակեն, ի վերջո՝ բունտը կա. եղանակներից մեկը արտագաղթն է: Տասը տարի է՝ Սերժ Սարգսյանի օրոք տարեկան 40-50 հազար մարդ մեկնում է»։
Բագրատ Ասատրյանի դիտարկմամբ՝ բունտ է, որ այս տարիներին 420 հազար մարդ մեկնել է. այս սարսափելի ցուցանիշը այս պայմաններում կպահպանվի և կավելանա։
Մանրամասները՝ տեսանյութում: