Իրանի իշխանությունները հայտարարել են, որ իրավիճակը երկրում արդեն հանդարտվել է՝ վերջին օրերին մահվան ելքով զանգածային ցույցերից հետո։ ՆԳ փոխնախարար Հուսեյն Զոլֆագարին հաստատում է, որ Իրանի շրջանների մեծամասնությունն այսօր արդեն հանգիստ է, փոխանցում է Мehrnews-ը։
Նրա խոսքով՝ ոստիկանությունն ուժ չի կիրառի և չի ձերբակալի խաղաղ ցուցարարներին։
«Ոստիկանության և ժողովրդական ակտիվիստների համագործակցությամբ մոտ ժամանակներս արդեն բոլոր բնակավայրերը կհանդարտվեն։ Բոլոր դեպքերում, քանի դեռ ցուցարարները վնաս չեն հասցրել պետական և հանրային սեփականությանը, ոստիկանությունը փափկություն է դրսևորում և փորձում վերահսկել իրավիճակը, սակայն այնտեղ, որտեղ ապստամբները խաղաղ հանրահավաքները վերածել են բախումների և վնաս հասցրել պետական և հանրային սեփականությանը, անվտանգության ուժերը վճռականորեն դիմակայել են նրանց»,-ասել է Զոլֆագարին։
