Հայաստանում Ռուսաստանի օգնությամբ ազգային ավիափոխադրող ստեղծելու ուղղությամբ ոչ մի աշխատանք չի տարվում։ Ամեն ինչ նախնական քննարկումների մակարդակում է։ Ոչ ավելի։ «Նորություն չկա։ Քննարկումներ եղել են, բայց նորություն, որպես այդպիսին, չկա։ Նախնական քննարկումների մակարդակում է ամեն ինչ»,- «Առաջին լրատվական»-ի հետ զրույցում ասաց քաղավիացիայի մամուլի խոսնակ Սաթենիկ Հովհաննիսյանը։
Հիշեցնենք, որ վերջին շրջանում ազգային փոխադրող ստեղծելու մասին խոսակցությունները ակտիվացան, երբ այս տարվա սկզբին ՌԴ արդյունաբերության և առևտրի նախարար Դենիս Մանտուրովը լրագրողների հետ հանդիպման ժամանակ հայտարարեց, որ Ռուսաստանը 5 տարվա ընթացքում Հայաստանին մոտ 10 միավոր Sukhoi SuperJet-100 ինքնաթիռ կվաճառի: Առաջին ինքնաթիռները կմատակարարվեն 2019-ի սկզբին, առաջին խմբաքանակը 2-4 միավոր կլինի:
ՀՀ-ում SSJ 100-ի հիմքի վրա նոր ավիաընկերության ստեղծման հարցը քննարկվել էր նաև տնտեսական զարգացման և ներդրումների նախարար Սուրեն Կարայանի և Ռուսաստանի Դաշնության արդյունաբերության նախարար Դենիս Մանտուրովի հետ հանդիպմանը Մոսկվայում։
«Խոսքը 5 տարվա ընթացքում 10 ինքնաթիռի վաճառքի մասին է: Կսկսենք 2 կամ 4 ինքնաթիռից: Եթե 2017-ին մենք կարողանանք ընկալելի ծրագիր ձևավորել, լուծում գտնել, այդ թվում՝ աղբյուրների մասով, ապա հաշվի առնելով արտադրական շրջանը՝ լավագույն դեպքում առաքումները կսկսվեն 2018-ի ավարտին կամ 2019-ի սկզբին: Կարծում եմ՝ ավելի իրատեսական է 2019-ը, քանի որ 2017-2018թթ. արդեն հագեցած են պատվերներով և պահեստամասերի առաքումներով»,- ասել էր ՌԴ պաշտոնյան։
«Սուխոյ Սուպերջեթ-100»-ը Ռուսաստանի Դաշնության արտադրության առաջին ուղևորատար օդանավն է, և, ընդ որում, այդ օդանավի առաջին գնորդը հենց ՀՀ ազգային փոխադրող «Արմավիա»-ն էր, որը 2011-ին գնեց «Յուրի Գագարին» անվանումով առաջին ինքնաթիռը: 2012-ին «Արմավիա» ավիաընկերությունը մտադիր էր «Սուխոյ Սուպերջեթ-100» երկու ինքնաթիռ գնել, սակայն հետո հրաժարվեց: Նման որոշման համար հիմք է հանդիսացել այն, որ «Արմավիա»-ի գնած Sukhoi Superjet առաջին ինքնաթիռը մեկ տարի շահագործելուց հետո այն վերանորոգելու անհրաժեշտություն էր առաջացել:
Ինչ վերաբերում է հենց այս ինքնաթիռների հիմքի վրա ազգային փոխադրող ստեղծելուն, ապա քաղավիացիայի նախկին ղեկավար Շահեն Պետրոսյանի խոսքով՝ այնքան էլ իրատեսական չէ։ Նման հայտարարությունից հետո այս փուլում ոչ մի գործնական քայլ չկատարելը հենց դրա մասին է խոսում։ «Ստերի երկիր է, ինչ սուտ ուզում՝ փչում են։ Իրենք գործ անող չեն։ Ազգային փոխադրող ստեղծելու պատմությունը Իրան-Հայաստան երկաթգծի պատմությունն է կամ «Արմենիկում»-ի պատմությունը։ Սերժիկը բոլորին խաբելով ման է գալիս, ինչ ասես։ Կառավարությունն էլ նույն կերպ՝ խաբեությամբ է զբաղված։ Ամբողջ երկիրը վաճառել են ռուսներին, հիմա էլ ուզում են ավիացիան վաճառել»,- «Առաջին լրատվական»-ի հետ զրույցում ասաց Պետրոսյանը։
Եվ հետո, Շահեն Պետրոսյանի խոսքով, Ռուսաստանը այնքան էլ շահագրգռված չէ Հայաստանում ազգային փոխադրող ստեղծելու գաղափարով, քանի որ այսօր Հայաստանից հենց իրենց օդանավերն են թռչում, մեր ամբողջ շուկան գրավել են իրենք, թռիչքները իրենք են իրականացնում։ «Ինչ իմաստ ունի ավելորդ փող ծախսել, ստեղ ավիաընկերություն ստեղծել։ Վաղը մյուս օրն էլ իշխանափոխություն լինի, ավիացիայի ոլորտն ազգայնացնելու խնդիր դրվի, իրենք արդեն վտանգի առաջ կկանգնեն։ Ռուսների մոտ այս վտանգը միշտ կա։ Եվ ինչու իզուր ռիսկի դիմել, երբ առանց այդ էլ իրենք լավ փող են աշխատում մեր շուկայի հաշվին։ Էս ամեն ինչը տեղի ունեցավ հենց բաց երկնքի քաղաքականության պատճառով, դա առ ոչինչ է։ Այնպես որ, ոչ մի լավ բան մի սպասեք»,- նշեց Պետրոսյանը։
Այս ամենից զատ, Պետրոսյանը նշեց, որ SuperJet-100 ինքնաթիռներից ամբողջ աշխարհում հրաժարվում են, իսկ Հայաստանը պատրաստվում է դրանց հիման վրա ազգային փոխադրող ստեղծել։ «Հիմա ով այդ ինքնաթիռների պայմանագրերից ունի, չեղյալ է համարում։ Այդ ինքնաթիռներից մեկը անգամ ավիաշոուի ժամանակ վթարվեց, ինչի մասին է խոսքը։ Այդ օդանավն առ այսօր միջազգային լիցենզիա չունի։ Մենք ունեցել ենք հուսալի «Աերբաս», «Բոինգ», ինչ իմաստ ունի նորից անցում կատարել SuperJet-ի։ Եվ հետո, ռուսները ոչ մի նոր բան չեն կարող ստեղծել։ Իրենք մնացել են նավթի, գազի ու Պուտինի թալանի վրա։ Ռուսների հետ ընդհանրապես գործ ունենալ չի կարելի։ Իրենց մոտ ամբողջությամբ թայֆա է՝ մաֆիա։ Նույնիսկ մեր օլիգարխները օլիգարխ չեն։ Իրենք ռուս բանտիտների դիստրիբյուտորներն են ընդամենը»,- եզրափակեց Շահեն Պետրոսյանը։