«Վերջերս տարածաշրջանում բավականին ակտիվ իրադարձություններ են ծավալվել՝ հիշենք Բաքու-Թբիլիսի-Կարս» երկաթգծի շահագործման առաջին փուլը։ Հավանաբար, այցի ընթացքում անդրադարձ կլինի այդ խնդրին։ Կարծում եմ՝ ավելի շատ ամփոփիչ այց կլինի․ տարին կամփոփվի ու համագործակցության նոր ուղղություններ կմշակվեն՝ հատկապես, որ Վրաստանում նոր դեսպան ունենք»- «Առաջին լրատվական»-ի հետ զրույցում նման տեսակետ հայտնեց Վրաստանի հարցերով փորձագետ Ջոնի Մելիքյանը՝ անդրադառնալով ՀՀ նախագահ Սերժ Սարգսյանի՝ դեկտեմբերի 26-ին Վրաստան կատարելիք այցին։
Փորձագետն անդրադարձավ նաև Հայաստան-ԵՄ շրջանակային փաստաթղթի ստորագրմանը։ Հարցին՝ սրանով մենք արդյո՞ք մոտեցանք ԱլԳ առաջատար եռյակ համարվող Վրաստանին, Ուկրաինային և Մոլդովային, Մելիքյանն արձագանքեց. «Մենք պետք է հասկանանք, որ Արևելյան գործընկերության մեջ ամեն մեկն ունի Եվրամիության հետ հարաբերությունների իր ֆորմատը։ Երեք երկրներ ստորագրեցին Ասոցացման փաստաթուղթը, Հայաստանն այս փաստաթուղթը, և կան Ադրբեջանն ու Բելառուսը, որոնք համագործակցության ավելի ցածր մակարդակի վրա են՝ 1996 թվականի ստորագրած փաստաթղթի։ Իմ կարծիքով՝ այստեղ այլ խնդիր կա։ Մոլդովան, Ուկրաինան և Վրաստանը փորձում են առանձնանալ այդ ֆորմատից, իրենք ցույց են տալիս, որ ունեն ցանկություն Եվրամիության անդամ դառնալ, ու ԵՄ-ն պետք է իրենց հանդեպ ավելի ուշադիր լինի։ Դրանով նրանք նաև առանձնանում են Հայաստանից, բայց ես չէի ասի, թե սա հայ-վրացական հարաբերությունների հարց է, իրենք իրենց հարաբերությունները Եվրամիության հետ են ուզում հստակեցնել, ավելի լուրջ գումարներ ստանալ»,- ասաց Մելիքյանը։
Մեր զրուցակիցը հավելեց, որ Վրաստանում այժմ Հայաստանի ներկայացուցչությունը թիմի փոփոխություն ու համալրում է նախատեսում, ինչն ըստ նրա՝ միանշանակ դրական է. «Ես սպասում եմ, որ հարաբերություններն ավելի կակտիվանան։ Երկկողմ հարաբերություններում կան ուղղություններ, որ կարող են խորացվել։ Բայց մենք պետք է հասկանանք, որ բացի սուբյեկտիվ հարցերից, կան նաև օբյեկտիվ հարցեր՝ իրենք մի քիչ ավելի շատ են Եվրոպա նայում։ Իրենք, սակայն, փորձում են տարածաշրջանում դիվերսիֆիկացնել հարաբերությունները։ Թուրքիա-Ադրբեջան-Վրաստան եռակողմ ձևաչափին զուգահեռ փորձում են ակտիվացնել հարաբերությունները Հայաստանի և Իրանի հետ։ Մենք ևս պետք է փորձենք հարաբերություններն ակտիվացնել Իրանի հետ, մեզանից շատ բան է կախված»,- եզրափակեց նա։
Հարցազրույցն ամբողջությամբ՝ տեսանյութում։