Լուրեր
Սահմանային լարվածություն ունեցող պետությունում տուգանքով ծառայությունից ազատվելն անընդունելի է
  • 09:15
  • 2017-12-13
  • Դիտումներ՝ *

«Սոցիալական արդարություն» ՀԿ նախագահ, քրեական արդարադատության հոգեբան Արշակ Գասպարյանը կարծում է, որ «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» օրենքում փոփոխություններ կատարելով՝ անհասկանալի է, թե ինչ խնդիր է լուծվում։

Վերջինս այս կապակցությամբ «Առաջին լրատվական»-ի հետ զրույցում նշեց. «Գումարը կամ տուգանքը վճարես և չծառայես՝ այդպիսի բան կարող են անել այն պետությունները, որոնք առաջին հերթին ունեն բազմամիլիոնանոց բնակչություն և զորակոչի խնդիր չունեն, երկրորդ՝ չունեն սահմանամերձ գոտիներում բախումների խնդիրներ. սա մի տարբերակն է, իսկ երկրորդ տարբերակն այն է, երբ ունես պայմանագրային զինծառայություն կամ այսպես կոչված՝ պրոֆեսիոնալ բանակ, որտեղ այնպես, ինչպես ցանկացած հաստատությունում, ծախսերը գլխաքանակով են հաշվարկվում, այսինքն՝ երբ ինչ-որ մեկն իր չծառայելու դիմաց գումար է վճարում, որ այն մարդու վիճակը, որը պետք է ծառայի բանակում, առավել բարվոք լինի։ Նման դեպքում, կարծում եմ, կարելի էր այդ գումարը վերցնել։

Այն դեպքում, երբ մենք ունենք սակավաթիվ բնակչություն և օրեցօր քչացող բնակչություն, այն դեպքում, երբ մենք սահմաններին անընդհատ լարվածություն ունենք, գրեթե ամեն տարի զորակոչի խնդիր ունենք և չունենք պրոֆեսիոնալ բանակ, ապա նման պարագայում այդ 3 միլիոն 600 հազար դրամը ես չգիտեմ, թե ընդհանրապես ում է պետք գալու։

Մյուս իմաստով պետք է հասկանանք նաև մեկ ուրիշ խնդիր՝ այո, այն մարդիկ, ովքեր ունեն այդ գումարը, նրանք կմուծեն և կազատվեն քրեական պատասխանատվությունից, իսկ նրանք, ովքեր չունեն, անապահով են, ապա նրանք կենթարկվեն պատասխանատվության։ Այս առումով ես կցանկանայի մեր ուշադրությունը սևեռել այն հանգամանքի վրա, թե ինչու են գնացել այդ մարդիկ՚ այն մարդիկ, ովքեր գնացել են նախազորակոչային տարիքում, ոչ միշտ է, որ իրենց կամքով են լքել Հայաստանը, այլ գնացել են իրենց ծնողների կամքով, և երբ նա դարձել է բանակային տարիքի երիտասարդ, ապա անկախ իր կամքից՝ հայտնվել է հետախուզման մեջ։

Բանակը թող լինի լավը, պետությունդ թող լինի քաղաքացու կողքին, որ մարդիկ էլ չգնան այստեղից, և քո երկրի արական սեռի ներկայացուցիչներն էլ մնան ու ծառայեն բանակում, բայց, ցավոք, մենք այսօր չունենք այդ իրավիճակը»։

Հիշեցնենք, որ ԱԺ-ն երկրորդ ընթերցմամբ ընդունեց և վերջին անգամ երկարաձգեց «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» օրենքում փոփոխություններ կատարելու մասին նախագիծը։

Ըստ օրենքի՝ բանակից խուսափած և հետախուզման մեջ գտնվող Հայաստանի քաղաքացիներին հնարավորություն կտրվի մինչև 2019 թվականի դեկտեմբերի 31-ը վերադառնալ, մուծել սահմանված 3 միլիոն 600 հազար դրամը և ազատվել քրեական հետապնդումից:

Մանրամասները՝ տեսանյութում։

  • Դիտումներ՝ *