Օրերս ԱՄՆ-ի նախագահ Դոնալդ Թրամփը ճանաչեց Երուսաղեմը որպես Իսրայելի մայրաքաղաք: Նա նաև հանձնարարեց ԱՄՆ-ի դեսպանատունը տեղափոխել Երուսաղեմ: Փորձագետների կարծիքով՝ Թրամփի այս քայլը հնարավոր է հանգեցնի տարածաշրջանի ապակայունացմանը: Թուրքիայի նախագահ Էրդողանն ասել էր, որ Թուրքիան, Երուսաղեմն Իսրայելի մայրաքաղաք ճանաչելու դեպքում, պատրաստ է խզել դիվանագիտական հարաբերություններն Իսրայելի հետ: Երուսաղեմի Հայոց պատրիարքությունը նույնպես մտահոգ է ստեղծված իրավիճակով:
«Առաջին լրատվական»-ի հետ զրույցում Երուսաղեմի Հայոց պատրիարքության դիվանապետ Կորյուն վարդապետ Բաղդասարյանը նշեց, որ այս պահին Երուսաղեմում ամեն բան խաղաղ է, միայն երեկ Երուսաղեմի բոլոր խանութները փակ են եղել. «Խանութպանները գործադուլ արեցին: Հիմնական բողոքի ցույցերն ու բախումները տեղի են ունեցել Պաղեստինում, Բեթղեհեմում: Բեթղեհեմում մենք ունենք հայկական վանք՝ Ծննդյան տաճարին կից: Այս պահի դրությամբ իրավիճակը խաղաղ է, մեր վանականները ապահով են: Այսօր ուրբաթ է՝ մահմեդականների սուրբ օրն է, և այսօր բազմաթիվ մահմեդականներ են գալիս աղոթելու իրենց կրոնի մեջ երրորդ սրբավայրը համարվող ալ-Աքսա մզկիթում: Գիտենք, որ ոստիկանությունը և բանակը մեծ ուժեր են կենտրոնացրել Երուսաղեմում, որպեսզի հավանական բախումները կանխեն»,- ասաց նա: Վախ կա, որ կլինեն բախումներ և նախապատրաստական աշխատանքներ են տարվում ոստիկանության և բանակի կողմից կանխելու որևէ բախում: Հայր Կորյունի խոսքերով՝ եթե բախումներ լինեն, հիմնականում կլինեն մահմեդական թաղամասում, որտեղ գտնվում է ալ-Աքսա մզկիթը:
«Մենք հուսով ենք, որ նման բախումներից մեր թաղամասը չի տուժի: Խուճապ չկա, բայց բոլորը մտահոգ են, որ այս հայտարարությունը կհանգեցնի բախումների, լարվածության և այնպիսի մի իրավիճակի, որ գուցեև հսկողությունից դուրս գա»,- ասաց հայր Կորյունը:
Նա նաև նշեց, որ քրիստոնյա հոգևոր առաջնորդները ստորագրել են նամակ, բոլորն էլ մտահոգ են։ «Մենք էլ ենք մտահոգ, որ այդ հայտարարությունները կծնեն նոր ատելություն և նոր բախումների կհանգեցնեն, բռնության և արդեն եղած տառապանքը, որ երկու ժողովուրդները ապրում են կոնֆլիկտի պատճառով, այդ տառապանքն էլ ավելի կավելանա, և ինչպես որ նշված է մամուլում, հոգևոր պետերը կոչ են անում, որ Թրամփը շարունակի ճանաչել մինչև հիմա Երուսաղեմի միջազգային ճանաչված կարգավիճակը»,- հավելեց հայր Կորյունը: