ԱՄՆ նախագահ Դոնալդ Թրամփի ազգային անվտանգության հարցերով նախկին խորհրդական Մայքլ Ֆլինի գործով նոր մեղադրանքները սառցալեռան տեսանելի մասն են միայն: Այս մասին հայտարարել են Ամերիկայի հայկական համագումարի համանախագահներ Էնթոնի Բարսամյանը և Վան Գրիգորյանը:
Նրանց կարծիքով՝ դեռ պետք է շատ մանրամասնություններ պարզվեն՝ հատկապես Թուրքիայի կողմից բարձր մակարդակով ազգային անվտանգության հարցերի միջամտությանը առնչվող: Այս մասին տեղեկացնում է ֆրանսիական «Յառաջը»:
«Ինչպես մենք արդեն նախկինում էլ ենք հայտարարել, Կոնգրեսը պետք է լայնածավալ հանրային լսումներ կազմակերպի, որպեսզի ամբողջովին բացահայտվեն ԱՄՆ կառավարության վրա ազդելու Թուրքիայի փորձերը, ինչը մեր ժողովրդավարական արժեքների դեմ անմիջական հարձակում է»,- հավելել են նրանք:
Տեղեկագրերը ցույց են տալիս, որ նախատեսված էր Ֆլինին վճարել 15 միլիոն դոլար, որպեսզի նա գաղտնի կերպով կազմակերպի հօգուտ Թուրքիայի լոբբինգ (appel d’offre), և վերոնշյալ գումարի 530 հազար դոլարն էլ արդեն վճարված է իրեն, մինչ ըստ ԱՄՆ արդարադատության նախարարության՝ այդ ժամանակ նա չէր երևում որպես օտար երկրի գործակալ:
Համագումարը բազմիցս ընդգծել է, որ Թուրքիան փորձում է գաղտնի կերպով ազդել ամերիկացի պաշտոնատարների վրա՝ ի վնաս երկրի ազգային անվտանգության, և կոչ է արել հետաքննություն ձեռնարկել: Համագումարը թուրքական և ադրբեջանական հանձնախմբերին անդամակցած կոնգրեսականներին էլ կոչ է արել վերջ տալ այդ անդամակցությանը, ինչը որ ոմանք արել են:
«Կոնգրեսի անդամները չպետք է գործակցեն եղծված և բռնատիրական նման վարչակարգերի հետ։ Նկատի ունենալով քրիստոնյաների նկատմամբ Թուրքիայի վերաբերմունքը, Հայոց ցեղասպանության ժխտումը, Ադրբեջանի՝ «Իսլամական պետության» ոճով գործելակերպը՝ եկել է ժամանակը, որպեսզի կոնգրեսականները վերջ դնեն Թուրքիայի և Ադրբեջանի հետ հարաբերություններին առնչվող հանձնախմբերի անդամակցությանը»,- ասել են համագումարի համանախագահները:
