American Airlines ավիաընկերությունը սուրբծննդյան տոների ժամանակ հերթական արձակուրդը ստացող օդաչուների ցուցակները կազմող ծրագրի խափանման պատճառով դեկտեմբերի երկրորդ կեսին չափից շատ օդաչուների է արձակուրդ տրամադրել, հայտնում է The Independent-ը: Հիմա ընկերությունը փորձում է կարգավորել իրավիճակը, երբ տարվա ամենալարված շրջաններից մեկում կմնա սահմանափակ թվով անձնակազմերով: Allied Pilots Association օդաչուների արհմիության գնահատմամբ՝ դեկտեմբերի 17-31-ին ավելի քան 15 000 չվերթի անձնակազմ ոչ լիարժեք կլինի, եթե ավիաընկերությունը ելք չգտնի ստեղծված իրավիճակից: Չվերթները, որոնց դա կարող է վերաբերել, մեկնում են Բոստոնից, Վաշինգտոնից, Նյու Յորքից, Մայամիից, Չիկագոյից, Ֆիլադելֆիայից և մի շարք այլ քաղաքներից:
American Airlines-ի մամլո քարտուղար Մեթ Միլլերը հայտարարել է, որ իրենք ակտիվորեն աշխատում են խնդրի լուծման ուղղությամբ և ակնկալում են, որ իրենց կհաջողվի խուսափել տոնական շրջանում չվերթները հետաձգելուց: Ավիաընկերության ղեկավարությունն էլեկտրոնային նամակներ է ուղարկել բոլոր օդաչուներին՝ առաջարկելով արտաժամյա աշխատել հավելյալ վճարի դիմաց: