«Եթե մենք զինվոր չունենք, 140 զինվորն էլ է մեծ թիվ։ Օրենքի փոփոխության անհրաժեշտությունը, հրամայականը շատ խորքային է»,- «Առաջին լրատվական»-ի հետ զրույցում ասաց բանակի խնդիրներով զբաղվող իրավապաշտպան Ռուբեն Մարտիրոսյանը՝ անդրադառնալով «Զինվորական ծառայության մասին» օրենքում կատարված փոփոխություններին, մասնավորապես տարկետման իրավունքի վերացմանը։
«Հայոց բանակում զինվորներին սպանում են, նրանց գործերը կոծկում են, անմեղ զինվորներին դատապարտում են չկատարած հանցագործությունների համար, իսկ իրական հանցագործները մնում են անպատիժ։ Դա գիտեն բոլորը։ Մենք պրոբլեմը արմատից չենք կարողանում լուծել։ Սերժն էլ ասում է՝ ինչ ուզում եք արեք։ Արդյունքում էլ անողները բանակի հերն անիծում են և ստիպված գնում են այնպիսի սխալ քայլերի, ինչպիսին տարկետման իրավունքի սահմանափակումն էր»,- ասաց իրավապաշտպանը։
Նրա խոսքով՝ տարկետման իրավունքի սահմանափակումը պետության զարգացմանը խոչընդոտող, սխալ քայլ էր։ «Եթե այդ 140 ասպիրանտների 10 տոկոսն էլ շարունակի զբաղվել գիտությամբ և արդյունք ունենա, դա մեր երկրի համար առաջընթացի խթան կհանդիսանա։ Բայց պաշտպանության նախարարությունը գնաց այդ ճանապարհով, քանի որ այսօր ոչ մեկը չի ցանկանում ծառայել բանակում՝ այդտեղ գործող բարքերի պատճառով, պաշտոնյաները փախցնում են իրենց երեխաներին։ Դրա համար այդ 140 հոգին էլ է էական։ Ես ունեմ տվյալներ, որ երբ Սերժ Սարգսյանի խնամին էր Կենտրոնական բժշկական հանձնաժողովի պետը, այդ ժամանակվանից կոռուպցիան մեծ տարածում գտավ բանակում։ «Առողջ զորակոչիկները ազատվում էին ծառայությունց, հիվանդները նրանց տեղը զորակոչվում էին բանակ։ Ամեն ինչ անում էին փող աշխատելու համար։ Հիմա էլ նույն վիճակն է՝ քիչ տարբերությամբ։ Հիմա էլ պարտադրանք է։ Տարկետման իրավունքի վերացումը ստիպողաբար կատարված քայլ էր»,- ասաց Մարտիրոսյանը։
Իրավապաշտպանի խոսքով՝ ստիպողաբար ծառայությունը հետևանքներ կունենա ինչպես բանակի, ծառայության վրա, այնպես էլ երկրի զարգացման. «Ստիպողաբար ծառայությունը հղի է շատ վատ հետևանքներով՝ լարվածություն, կոնֆլիկտային իրավիճակներ։ Մինչդեռ պետք է ճիշտ հակառակն արվեր։ Ամեն ինչ պետք է արվեր, որ հայ երիտասարդը հաճույքով ու սիրով գնար ծառայության։ Իսկ դրա համար էլ պետք է բեսպրեդելը վերացվի բանակից, կանոնադրական պայմաններ հաստատվեն, քանի որ հայ զինվորն այսօր գտնվում է ստրկատիրական վիճակում, ոտնահարվում են զինվորի բոլոր իրավունքները։ Եթե այս վիճակը վերացվի, նոր կարելի է ինչ-որ հարցեր քննարկել»։
Լուսանկարը՝ Photolure-ի
