Արժույթի միջազգային հիմնադրամի հրապարակած զեկույցում Հայաստանի տնտեսական աճի վերաբերյալ ցուցանիշների հարցում որևէ կասկածանք լինել չի կարող, նրանց գնահատականները միշտ համապատասխանում են իրականությանը: Այս մասին «Առաջին լրատվական»-ի հետ զրույցում ասաց «Ծառուկյան» խմբակցության պատգամավոր Վարդան Բոստանջյանը՝ անդրադառնալով ԱՄՀ զեկույցին, որտեղ նշվում է, որ 17թ. Հայաստանի համար կարելի է կանխատեսել հազիվ 3.5 տոկոս աճ, իսկ 2018թ.՝ 2.9 տոկոս աճ:
«Կարևորում ենք բոլոր այն կազմակերպությունների, մասնավորապես ԱՄՀ Վերլուծական կենտրոնի արդյունքներն ու աշխատանքները, որոնք հիմնված են բացառապես մասնագիտական համալիր ու համակողմանի վերլուծությունների վրա»,- շեշտեց նա:
Անդրադառնալով հարցին՝ արդյոք սա չի՞ նշանակում, որ կառավարության հրաժարականը պահանջելու համար ևս մեկ առիթ կա, քանի որ կառավարությունը խոսում է 4,3 տնտեսական աճի մասին, իսկ զեկույցից ակնհայտ է, որ ոչ միայն այդքան աճ չի ապահովվելու, այլև գնալով նվազելու է, Վարդան Բոստանջյանը ասաց. «Մեզ ընձեռած չէ դրա վերաբերյալ որոշում կայացնելու հնարավորություն: Գոյություն ունի կայուն մեծամասնություն, թող կայուն մեծամասնությունը որոշի՝ էս կառավարությունը մնո՞ւմ է, թե՞ գնում է: Առիթները, հանգամանքը մեզանում լրիվ իրականության հետ աղերս չեն ունենում: Այդ կտրվածքով մեր գնահատականը սրա վերաբերյալ կարող է բացարձակապես կապ չունենալ զարգացումների հետ: Քանի որ մեր նոր Սահմանադրությամբ ունենք կայուն մեծամասնություն, սկզբունքային որոշումները կայացվում են կայուն մեծամասնության կողմից: Էդ կտրվածքով ոչ մեծամասնության մեջ մտնող ուժերը չեն կարող գնահատական տալ, անհեռանկարային է ցանկացած գնահատական»,- շեշտեց նա:
Վարդան Բոստանջյանը նշեց, որ չնայած աճի միտումների մասին է կառավարությունը խոսում, բայց հասարակության լայն մեծամասնությունը իր կենսամակարդակի վրա դա չի զգում. եթե հասարակությունը ներդրումային միջավայրում, ազատ տնտեսական հարաբերությունների մասով, տնտեսական աճի մասով իր վրա փոփոխություն չի զգում, ապա մնացածը դատարկ խոսակցություններ են:
Վարդան Բոստանջյանը նաև ասաց, որ կառավարության խոստացած ներդրումային բումն էլ տեղի չունեցավ, քանի որ ՀՀ-ում ներդրումային միջավայրը գրավիչ չէ:
Անդրադառնալով հարցին՝ արդյոք Գագիկ Ծառուկյանը չէ՞ր կարող, անկախ քաղաքական զարգացումներից, ընտրությունների արդյունքից, 15 մլրդ ներդրումներ բերել՝ երկրի սոցիալ-տնտեսական միջավայրը մեղմելու համար, Վարդան Բոստանջյանը արձագանքեց. «Սա կույս օրիորդների տեղամաս չէ, սա երկիր է. 15 մլրդ-ի փոխարեն 50 մլրդ էլ կարելի էր բերել, բայց բերես՝ ո՞ւմ տաս, որ տեղի ունենա էդ փողի հետ այն, ինչ տեղի՞ է ունենում: Դուք նմանեցնում ենք նրան, որ մարդիկ իրենց ունեցվածքը առանց որևէ հեռանկարի բերեն տան ձեզ: Մեծ համակարգերի մասին է խոսքը: Ինչու է ՀՀ-ում գործարար միջավայրը միակողմանի ու ոչ արդյունավետ, պայմանավորված մրցակցության բացակայությամբ, փոքր և միջին բիզնեսի չգործելով և այլ խնդիրներով: Այս պարագայում 15 չէ, 20, 50 մլրդ էլ բերես, այն կարող է փոշիանալ՝ ինչպես ջուրը ավազի մեջ»:
Մանրամասները՝ տեսանյութում:
