ՀՀ սփյուռքի նախարարության, ՀՀ առողջապահության նախարարության և «Ակցիա առողջություն Հայաստան-Ֆրանսիա» կազմակերպության նախաձեռնությամբ Երևանում մեկնարկեց սրտաբանների եվրակովկասյան 6-րդ համաժողովը: Բացման խոսքում ՀՀ սփյուռքի նախարար Հրանուշ Հակոբյանն ասել է, որ համաժողովի ընթացքում կլինեն նոր համագործակցություններ մասնակից երկրների մասնագետների միջև: «Կարծում եմ համաժողովը կծառայի իր նպատակին: Այն բարեկամանալու,ընկերանալու լավագույն վայր է: Կարևորն այն է, որ մեր օտարերկրյա բարեկամները կներկայացնեն այն ձեռքբերումներն ու հաջողությունները, որոնք արձանագրվել են սրտաբանության ոլորտում: Ուզում եմ նաև հավատալ, որ այս օրերը կլինեն Հայաստանը տեսնելու, վայելելու և նոր հաջողություններ արձանագրելու ժամանակահատված»,-ասաց նա:
Հանրահայտ սրտաբան Փոլ Բարագանի խոսքով` այս տարի անցկացվող երկօրյա համաժողովին տեսականորեն և գործնականորեն անդրադարձ կկատարվի սրտանոթային ամենատարբեր խնդիրներին: «Մենք գործնականորեն կփորձենք պատասխան տալ բազմաթիվ կլինիկական խնդիրների: Ես առաջարկում եմ բոլորիս ուշադիր լսել միմյանց»,-ասաց նա:
Սրտաբանների եվրակովկասյան 6-րդ համաժողովին այս տարի մասնակցում է 38 օտարազգի և սփյուռքահայ հայտնի սրտաբաններ` Ֆրանսիայից, Իրանից, Իտալիայից, Մոնակոյից: Շուրջ 250 սրտաբաններ Հայաստանից և Արցախից կմասնակցեն համաժողովի շրջանակներում կազմակերպվելիք սեմինարներին:
Համաժողովի նպատակն է նպաստել սրտաբանության ոլորտի զարգացմանը, աշխարհի հայ սրտաբանների ներուժի համախմբմանը, Հայաստանի, Սփյուռքի և Արցախի սրտաբանների համագործակցությանը , մասնագիտական որակների բարձրացմանն ու կատարելագործմանը: