ԱՄՆ պետքարտուղար Ռեքս Թիլերսոնը հայտարարել է, որ չի ծրագրում լքել իր պաշտոնը։ Այս մասին նա ասել է ABC հեռուստաալիքի հետ հարցազրույցում՝ ի պատասխան այդ շշուկները մեկնաբանելու խնդրանքի։
«Կարծեմ մենք ունենք պետքարտուղար, և կարծում եմ, նա ծրագրում է մնալ պաշտոնում»,-ասել է Պետդեպի ղեկավարը։
Ավելի վաղ շշուկներ էին տարածվել, որ Թիլերսոնը կարող է լքել իր պաշտոնը մինչ տարեվերջ՝ Սպիտակ տան հետ տարաձայնությունների պատճառով։
Սեպտեմբերի սկզբին ՄԱԿ-ում ԱՄՆ մշտական ներկայացուցիչ Նիկի Հեյլին պատմել էր, որ ԱՄՆ նախագահ Դոնալդ Թրամփն իրեն առաջարկել է ԱՄՆ պետքարտուղարի աշխատանքը, սակայն ինքը հրաժարվել է։ Այսօր նա կրկին հաստատել է այդ պաշտոնում աշխատելու ցանկության բացակայությունը։
